पुणे, दि. २ (पीसीबी) : उपमुख्यमंत्री अजित पवार यांच्या पत्नी सुनेत्रा पवार या आज भोर तालुक्याच्या दौऱ्यावर आहेत. त्यांनी या दौऱ्यादरम्यान आज काँग्रेसचे आमदार आणि माजी मंत्री संग्राम थोपटे यांचे वडील अनंतराव थोपटे यांची राहत्या घरी जावून भेट घेतली. त्यांच्या भेटीवर राजकीय वर्तुळात वेगवेगळ्या चर्चांना उधाण आलं आहे. सुनेत्रा पवार यांनी अनंतराव थोपटे यांची भेट घेतली तेव्हा संग्राम थोपटे, यांच्या पत्नी स्वरुपा थोपटे आणि पुत्र पृथ्वीराज थोपटे हे देखील उपस्थित होते. तर संग्राम थोपटे विधानसभेच्या अधिवेशनामुळे सध्या मुंबईत आहेत. दरम्यान, या भेटीवेळी सुनेत्रा पवार यांनी अनंतराव थोपटे यांच्या प्रकृतीची विचारपूस केली. थोपटे कुटुंबीय आणि सुनेत्रा पवार यांच्या भेटीनंतर राजकीय वर्तुळात वेगवेगळे तर्कवितर्क लावले जात आहेत.
अनंतराव थोपटे हे 6 वेळा काँग्रेस पक्षाकडून विधानसभेवर आमदार म्हणून निवडून गेले आहेत. तर त्यांचे पुत्र आणि भोर विधानसभा मतदारसंघांचे विद्यमान आमदार संग्राम थोपटे हे सलग 3 वेळा काँग्रेसकडून आमदार म्हणून निवडून आले आहेत. थोपटे घराणं पहिल्यापासून काँग्रेसशी एकनिष्ठ राहीलं आहे. बारामती लोकसभा मतदारसंघातील भोर विधानसभेमध्ये येणाऱ्या भोर, वेल्हा, मुळशी या तीनही तालुक्यात थोपटे यांचं गेली अनेक दशकं वर्चस्व आहे.
दरम्यान, सुनेत्रा पवार यांनी लोकसभा निवडणुकांसाठी कंबर कसली आहे. सुनेत्रा पवार यांच्याकडून विधानसभा निवडणुकीसाठी जोरदार मोर्चेबांधणी केली जात आहे. त्यांचा पक्षाच्या नेते, पदाधिकारी, कार्यकर्ते आणि सर्वसामान्यांच्या गाठीभेटी घेण्यावर जोर आहे. त्यामुळे आगामी लोकसभा निवडणुकांमध्ये मतांचं गणित जुळवण्यासाठी सुनेत्रा पवार यांनी थोपटे कुटुंबियांची भेट घेतली तर नाही ना? असा प्रश्न या निमित्ताने उपस्थित केला जातोय. तसेच या भेटीमागे आणखी काही राजकीय कारण आहे का? अशा देखील चर्चा सध्या राजकीय वर्तुळात सुरु आहे.
