पुणे, दि.03 (पीसीबी) : मुख्यमंत्री देवेंद्र फडणवीस यांची भेट घेणाऱ्या तिघा माजी नगरसेवकांची ठाकरे गटातून हकालपट्टी करण्यात आली आहे. शिवसेनेच्या ध्येयधोरणाच्या विरोधात भूमिका घेतल्याने पुणे महापालिकेतील माजी नगरसेवक बाळा ओसवाल, विशाल धनवडे, पल्लवी जावळे यांची शिवसेना (उद्धव बाळासाहेब ठाकरे) पक्षप्रमुख उद्धव ठाकरे यांच्या आदेशाने पक्षातून हकालपट्टी करण्यात आली आहे.
शिवसेना उद्धव बाळासाहेब ठाकरे गटाच्या पुण्यातील तिघा नगरसेवकांनी भारतीय जनता पक्षात प्रवेश करणार असल्याचे जाहीर केल्याने पक्षात मोठी खळबळ उडाली होती. शिवसेना पक्षप्रमुख उद्धव ठाकरे यांनी याची गांभीर्याने दखल घेऊन पुणे शहर पदाधिकाऱ्यांची गुरुवारी ‘मातोश्री’वर दोन तास बैठक घेऊन आढावा घेतला.
शिवसेनेचे माजी नगरसेवक विशाल धनवडे, बाळा ओसवाल आणि पल्लवी जावळे यांनी मुख्यमंत्री देवेंद्र फडणवीस यांची मुंबईत भेट घेतली. धनवडे आणि ओसवाल यांनी सोशल मीडियावर पोस्ट करून शिवसेनेला रामराम करून भाजपमध्ये प्रवेश करणार असल्याचे स्पष्ट केले. त्यामुळे शहर शिवसेनेत (उबाठा) खळबळ उडाली.
भाजपमध्ये का प्रवेश करत आहेत?
पक्षप्रमुख उद्धव ठाकरे यांनी पुणे शहर पदाधिकाऱ्यांना मुंबईत येण्याचे आमंत्रण दिले. शहरप्रमुख संजय मोरे, आबा निकम, उप विभागप्रमुख प्रमोद शिंदे, माजी नगरसेवक संजय भोसले आणि नगरसेविका श्वेता चव्हाण यांचे चुलत सासरे शंकर चव्हाण आदींनी गुरुवारी उद्धव ठाकरे यांची भेट घेतली. या वेळी खासदार संजय राऊत, विनायक राऊत, सुभाष देसाई आदी उपस्थित होते. पक्षाचे नगरसेवक भाजपमध्ये का प्रवेश करीत आहेत, याची सर्व माहिती ठाकरे यांनी पदाधिकाऱ्यांकडून जाणून घेतली.
‘पक्षातून जे गेले किंवा जात आहे, त्यांना जाऊ द्या. आपल्याला आगामी महापालिका निवडणुकीच्या तोंडावर नव्याने पक्षाची बांधणी करायची आहे. पक्ष सोडून जाणाऱ्या नगरसेवकांच्या बदल्यात नवीन पदाधिकारी निर्माण करा. प्रत्येक प्रभागात चार उमेदवारांची चाचपणी सुरू करण्याच्या तयारीला लागा,’ असे आदेश ठाकरे यांनी पदाधिकाऱ्यांना दिले.
भाजप प्रवेशाच्या चर्चा, राजन साळवी उद्धव ठाकरेंची साथ सोडणार?
सध्या पुणे शहरात शिवसेनेचे संजय भोसले, पृथ्वीराज सुतार आणि श्वेता चव्हाण हे तीनच नगरसेवक उरले आहेत. संजय भोसले आणि श्वेता चव्हाण यांनी उद्धव ठाकरे यांच्यासोबत राहणार असल्याचे स्पष्ट केले आहे
