मुंबई,दि.०५(पीसीबी) – जवळपास दोन आठवडे चाललेल्या राजकीय घडामोडींनंतर, नाट्यपूर्ण घटनांनंतर राज्यात सत्तांतर झालं. मुख्यमंत्री एकनाथ शिंदेंनी बहुमत सिद्ध केलं. आमदारांचं बंड मोडून काढण्यासाठी शिवसेनेनं प्रयत्न केले. मात्र ते तोकडे पडले. गुवाहाटीमधून आलेले बंडखोर आमदार गोव्यातील ताज हॉटेलमध्ये वास्तव्यास होते. तिथे प्रवेश करण्यासाठी बोगस कागदपत्रांचा वापर केल्यानं दोघींना अटक झाली. या दोघी राष्ट्रवादी काँग्रेसशी संबंधित आहेत. न्यायालयानं दोघींना जामीन मंजूर केला आहे.
हॉटेलमध्ये प्रवेश करताना बोगस कागदपत्रांमुळे अटक झालेल्या श्रेया कोठिवाल देहरादूनच्या, तर सोनिया दुहन हरयाणाच्या आहेत. दुहन अडीच वर्षांपूर्वी चर्चेत आल्या होत्या. त्यावेळी राष्ट्रवादीचे नेते अजित पवारांनी बंड केलं होतं. भाजप नेते देवेंद्र फडणवीस यांच्यासोबत पहाटे शपथविधी उरकला होता. त्यावेळी राष्ट्रवादीचे चार आमदार गुरुग्रामच्या हॉटेलमध्ये वास्तव्यास होते. त्यांना माघारी आणण्यात दुहन यांनी महत्त्वाची भूमिका बजावली होती. मात्र यावेळी त्यांचं मिशन फेल गेलं.
पणजी पोलिसांनी सोनिया दुहन आणि श्रेया कोठियाल यांना आयपीसीच्या कलम ४१९ आणि ४२० अंतर्गत अटक केली. या दोघींनी गेल्या शुक्रवारी बंडखोर आमदारांचं वास्तव्य असलेल्या हॉटेलमध्ये बोगस ओळखपत्रांच्या आधारे प्रवेश करण्याचा प्रयत्न केला. याची माहिती हॉटेल कर्मचाऱ्यांनी पोलिसांना दिली. या घटनेमुळे सोनिया दुहन पुन्हा चर्चेत आल्या. अडीच वर्षांपूर्वीचा त्यांनीच राष्ट्रवादीच्या आमदारांची घरवापसी घडवून आणली होती.
गेल्या विधानसभा निवडणुकीनंतर महाविकास आघाडी तयार झाली. मात्र सत्तेचं समीकरण निश्चित झालं असताना अजित पवारांनी देवेंद्र फडणवीसांसोबत पहाटे शपथविधी उरकला. अजित पवारांसोबत बरेच आमदार होते. त्यापैकी चार आमदारांचा मुक्काम गुरुग्रामच्या हॉटेलमध्ये होता. हॉटेल ओबेरॉयमध्ये आमदार दौलत दरोडा, नरहरी झिरवळ, नितीन पवार आणि अनिल पाटील वास्तव्यास होते. हॉटेलभोवती भाजपच्या १५० कार्यकर्त्यांचा पहारा होता.
हॉटेलमध्ये येणाऱ्या जाणाऱ्या प्रशासनाची आणि पोलिसांची नजर होती. मात्र तरीही सोनिया यांनी चार आमदारांना तिथून बाहेर काढण्यात मोलाची भूमिका बजावली. २०१९ मध्ये यशस्वी ठरलेल्या सोनिया दुहान यांच्यावर गोव्यात असलेल्या बंडखोर आमदारांना शिवसेनेच्या गोटात परत आणण्याची जबाबदारी देण्यात आली होती. मात्र यावेळी त्यांना अपयश आलं. मात्र आम्ही गोव्यात केवळ पर्यटनासाठी गेलो होतो, असा दावा दुहन यांनी केला. राष्ट्रवादीनंसुद्धा हाच दावा केला.
कोण आहेत सोनिया दुहन?
सोनिया दुहन हरयाणामधील हिसारच्या रहिवासी आहेत. तीन भावंडांमध्ये त्या सगळ्यात मोठ्या आहेत. हिसारमध्येच सोनिया यांनी शालेय शिक्षण घेतलं. यानंतर कुरुक्षेत्र विद्यापीठातून त्यांनी बीएससी केलं. मग त्या अंबालाला आल्या. पायलटचं ट्रेनिंग घेण्यासाठी त्यांचं वास्तव्य पुण्यात होतं. तिथेच त्या राष्ट्रवादीच्या नेत्यांच्या संपर्कात आल्या. वयाच्या २१ व्या वर्षी त्यांनी राष्ट्रवादीत प्रवेश केला. दिल्ली विद्यापीठात दोन निवडणुकांमध्ये त्यांनी राष्ट्रवादीचं नेतृत्त्व केलं. त्या एकदा राष्ट्रवादीच्या प्रदेश अध्यक्ष राहिल्या. त्यानंतर राष्ट्रीय महासचिव झाल्या. पक्षाच्या युवक संघटनेच्या राष्ट्रीय अध्यक्ष म्हणूनही त्यांनी काम केलं.
