मुंबई, दि. ११ : महाराष्ट्राचे मुख्यमंत्री देवेंद्र फडणवीस यांनी शरद पवार गटाचे अध्यक्ष शरद पवार यांच्या नुकत्याच राष्ट्रीय स्वयंसेवक संघाबाबत केलेल्या वक्तव्यावर प्रतिक्रिया दिली आहे. शरद पवार म्हणाले होते की, विधानसभेतील भारतीय जनता पक्षाच्या विजयासाठी राष्ट्रीय स्वयंसेवक संघ (RSS) ला जबाबदार आहे. यावर फडणवीस म्हणाले की, ‘शरद पवार हे चाणाक्ष आहेत. कधी कधी प्रतिस्पर्ध्याचंही कौतुक करावं लागतं.
राष्ट्रीय स्वयंसेवक संघाचे ज्येष्ठ नेते विलास फडणवीस यांच्या स्मरणार्थ आयोजित करण्यात आलेल्या पुरस्कार सोहळ्याला उपस्थित राहण्यासाठी देवेंद्र फडणवीस नागपुरात आले होते.
महाराष्ट्र विधानसभा निवडणुकांचे निकाल हे पूर्णपणे वेगळे लागले, विधानसभा निवडणुकीत महाविकास आघाडी धुवून निघाली. शरद पवार साहेब अतिशय चाणाक्ष आहेत. त्यांनी निश्चितपणे याचा अभ्यास केला असेल की इतक्या मोठ्या प्रमाणात आम्ही तयार केलेलं वायुमंडल हे एका मिनिटात पंक्चर झालं, तर हे करणारी शक्ती कोण? त्यांच्या हे लक्षात आलं की ही शक्ती नियमितपणे राजकारण करणारी शक्ती नाही, ही राष्ट्रकारण करणारी शक्ती आहे. प्रतिस्पर्ध्याचंही कौतुक करावं लागतं, त्या हिशोबाने त्यांनी ते कौतुक केलं असावं असं माझं मत आहे, असं फडणवीस म्हणाले.
राष्ट्रवादी काँग्रेस (शरदचंद्र पवार) आणि राष्ट्रवादी काँग्रेस (अजित पवार) जवळ येण्याच्या किंवा पुन्हा एकत्र येण्याच्या शक्यतेवर देवेंद्र फडणवीस म्हणाले, ‘मी तुम्हाला सांगतो २०१९ नंतर तुम्ही माझी विधाने ऐकली असतील. २०१९ ते २०२४ या काळात घडलेल्या घटनांमुळे मला हे समजले आहे की काहीही अशक्य नाही. कुठलीही गोष्ट होणार नाही असे समजून चालायचं नाही. काहीही होऊ शकते. उद्धव ठाकरे तिकडे जाऊ शकतात, अजित पवार इकडे येतात. राजकारणात काहीही होऊ शकते. असं व्हावं असं बिलकुल नाही, हे होणंही फार चांगलं नाही, या मताचा मी नाही, पण राजकारणात हे लक्षात ठेवलं पाहिजे की खूप ठामपणे असं होणारच नाही असं जेव्हा आपण म्हणतो, त्यावेळी राजकीय परिस्थिती तुम्हाला कुठे नेऊन बसवेल हे सांगता येत नाही.
