पिंपरी दि. ९ (पीसीबी) -पुण्यामध्ये एका तरुण व्यावसायिकाचे अपहरण करून 20 कोटी रुपयाची खंडणी मागीतल्याप्रकरणी कुविख्यात गँगस्टर गजा मारणे व त्याच्या गॅंगवर गुन्हा दाखल करण्यात आला आहे. या प्रकरणाची माहिती मिळताच पोलिसांनी तातडीने कारवाई करून या व्यावसायिकाची पोलिसांनी सुखरूप सुटका केली.
या घटनेची थोडक्यात माहिती अशी,
- तक्रारदार यांची शेअर मार्केट व्यवहारांची कंपनी आहे. या कंपनीत हेमंत पाटील यांनी गुंतवणूक केली होती. पण, तक्रारदार यांची कंपनी काही कारणास्तव डबघाईला आली.
- हेमंत पाटील यांनी जवळपास २० कोटींची गुंतवणूक केलेली होती. त्यातील १६ कोटी तक्रारदार यांनी परत देखील केले होते.
- उरलेली रक्कम म्हणजेच ४ कोटी राहिले होते. ते पैसे मिळवण्यासाठी पाटील यांनी पप्पू घोलपला सांगितले होते.
- यानंतर हे पैसे तक्रारदार यांच्याकडून मिळवून देण्यासाठी गजा मारणे व त्यांची गॅंग यामध्ये सहभागी झाली.
- त्यांनी शुक्रवारी दुपारी या व्यावसायिकाचे कात्रज परिसरातून कारमध्ये अपहरण केले. त्याच्याकडे २० कोटींची खंडणी मागितली.
- ही बाब खंडणी विरोधी पथक दोनचे पोलीस निरीक्षक बालाजी पांढरे व त्यांच्या पथकाला मिळाली. पोलिसांनी अथक प्रयत्न करून या व्यावसायिकाची पप्पू घोलप व गॅंगकडून तक्रारदाराची सुखरूप सुटका केली.
याप्रकरणी एका महिलेसह गजा मारणे, पपू घोलप, हेमंत पाटील, फिरोज तात्या, अमर किरदत्त, रुपेश मारणे व त्यांचे इतर साथीदार यांच्यावर गुन्हा नोंद करण्यात आला आहे. याबाबत एका ३३ वर्षीय व्यावसायिकाने तक्रार दिली आहे. भारती विद्यापीठ पोलीस ठाण्यात गुन्हा नोंद करण्यात आला आहे.
