उपाध्यक्ष पदाचा निवडणूक कार्यक्रम जाहीर झाला आहे. मंगळवारपर्यंत (25 मार्च 2025) अर्ज दाखल करता येणार आहेत. त्यानंतर 26 तारखेला उपाध्यक्षाची निवड होणार आहे. महायुतीत नेमकं कोणत्या पक्षाला आणि कोणत्या नेत्याला विधानसभा उपाध्यक्षपद मिळते याबाबत चर्चा सुरू आहे. महायुतीत विधानसभा अध्यक्षपदी राहुल नार्वेकर आणि विधानपरिषद सभापतीपदी राम शिंदे हे भाजपचे सदस्य आहेत. विधान परिषद उपसभापती पदावर शिंदेंच्या शिवसेनेच्या निलम गोऱ्हे आहेत. आता विधानसभा उपाध्यक्षपद हे अजित पवार यांच्या राष्ट्रवादीकडे जाणार असून पिंपरी चे आमदार अण्णा बनसोडे यांचे निवावर शिक्कामोर्तब करण्यात आले आहे.
लोकसभा निवडणुकीत महायुतीला मोठा फटका बसला होता. तर महाविकास आघाडीनं चांगलीच मुसंडी मारल्याचं पाहायला मिळालं होतं. या लोकसभा निवडणुकीत अनेक दिग्गज नेत्यांचा पराभव झाला होता. मात्र, त्यानंतर झालेल्या विधानसभा निवडणुकीत महायुतीनं मोठं यश मिळवलं आहे. महायुतीनं राज्यात सत्ता स्थापने केली. दवेंद्र फडणवीस हे राज्याचे मुख्यमंत्री झाले तर एकनाथ शिंदे आणि अजित पवार हे उपमुख्यमंत्री झाले. या निवडणुकीत भाजप राज्यातील सर्वात मोठा पक्ष ठरल्यामुळं विधासभा अध्यक्षपदी भाजप नेत्याची निवड करण्यात आली. पुन्हा राहुल नार्वेकर यांनाचं विधासभा अध्यक्षपद देण्यात आलं. त्यानंतर आता विधानसभा उपाध्यक्षपद कोणत्या पक्षाला जाणार याची चर्चा सुरु होती, ते आपसूक अजित पवार यांच्या राष्ट्रवादीकडे आले आहे.
सध्या विधानसभेचे अर्थसंकल्पीय अधिवेशन सुरु आहे. हे अधिवेशन 3 मार्चला सुरु झाले आहे. 26 मार्च 2025 पर्यंत म्हणजे आणखी तीन दिवस हे अधिवेशन चालणार आहे. दरम्यान, विधानसभा आणि विधानपरिषदेत या दोन्ही सभागृहात 10 मार्च रोजी राज्याचे अर्थमंत्री अजित पवार यांनीअर्थसंकल्प मांडला. सध्या विविध मुद्यांवरुन विरोधक आणि सत्ताधारी आमने सामने येत असल्याचं चित्र पाहायला मिळत आहे. नागपूर हिंसाचार प्रकरण असेल, औरंगजेब कबरीचा मुद्दा असेल, त्याचबोरबर दिशा सालियन प्रकरण असेल तसेच शेतकऱ्यांच्या विविध प्रश्नांवरुन विरोधकांनी सत्ताधाऱ्यांना धेरवर धरण्याचं काम केलं आहे.
