चिंचवड, दि. २८ : ऋषिपंचमीच्या पावन दिनी चिंचवड नगरीत भक्तिभावाचे दाट वातावरण अनुभवायला मिळाले. स्वातंत्र्यवीर सावरकर मंडळ, संस्कृती संवर्धन व विकास महासंघ विभाग आणि चिंचवड देवस्थान ट्रस्ट यांच्या संयुक्त विद्यमाने व गजानन महाराज मंदिर यांच्या सहकार्याने सामुदायिक अथर्वशीर्ष पठणाचे आयोजन करण्यात आले.
चिंचवडचे आराध्य दैवत श्रीमन् महासाधू श्री मोरया गोसावी यांच्या पवित्र वाड्यात सुमारे सातशे भाविकांनी एकत्र येऊन अथर्वशीर्ष पठणाचा आनंद घेतला. मंत्रोच्चार, शंखनाद व वेदघोषाने वातावरण पवित्र व मंगलमय झाले.
दीपप्रज्वलन सुरेश भोईर, अश्विनी चिंचवडे, गतीराम भोईर, माधुरी कवी व डॉ. अजित जगताप यांनी केले. गायत्री गणेश याग राजेंद्र देसले, लीलाधर भोळे व शांतीकुंज हरिद्वार गायत्री परिवाराच्या मार्गदर्शनाखाली पार पडला. समारोप आरती भास्कर रिकामे, अपर्णा कुलकर्णी, उज्वला कवडे व सुषमा वैद्य यांच्या शुभहस्ते झाला.
