दि.२४(पिसीबी) महाराष्ट्राला हादरवणारी एक अत्यंत धक्कादायक आणि गंभीर बातमी नाशिक मधून समोर येत आहे. भोंदू बाबा म्हणून ओळखला जाणारा अशोक खरात याच्या प्रकरणाने आता भयावह वळण घेतलं असून, तपासात एकामागून एक खळबळजनक खुलासे होत आहेत.
या प्रकरणात आज न्यायालयात महत्त्वाची सुनावणी पार पडली. अशोक खरात याची पोलीस कोठडी संपत असल्याने त्याला न्यायालयात हजर करण्यात आलं. यावेळी सरकारी वकिलांनी न्यायालयासमोर अत्यंत गंभीर आणि धक्कादायक दावे मांडले. त्यानुसार, अशोक खरात याने तब्बल पाच नरबळी दिल्याचा संशय व्यक्त करण्यात आला आहे. या दाव्यामुळे संपूर्ण राज्यात भीती आणि संतापाची लाट पसरली आहे.
सरकारी वकिलांनी दिलेल्या माहितीनुसार, पोलिसांनी आरोपीच्या घराची सखोल झडती घेतली असता काही महत्त्वाचे पुरावे हाती लागले आहेत. झडतीदरम्यान एक पिस्टल जप्त करण्यात आली असून, याच पिस्टलचा वापर करून पाच जणांची हत्या—म्हणजेच नरबळी—दिल्याचा संशय व्यक्त केला जात आहे. या संदर्भातील अधिक पुरावे गोळा करण्याचे काम सध्या सुरू आहे.
या संपूर्ण प्रकरणाचा उलगडा एका पीडित महिलेच्या तक्रारीनंतर झाला. संबंधित महिलेनं अशोक खरातवर लैंगिक अत्याचाराचे आरोप करत पोलिसांत तक्रार दाखल केली. या तक्रारीनंतर पोलिसांनी तपासाची चक्रे वेगाने फिरवली आणि आरोपीचं भोंदूपण उघडकीस आलं.
तपासादरम्यान पोलिसांना आरोपीकडून जप्त करण्यात आलेल्या पेन ड्राईव्हमध्ये सुमारे 100 व्हिडिओ सापडले आहेत. या व्हिडिओंमध्ये महिलांवर अत्याचाराचे दृश्य असल्याचा संशय व्यक्त केला जात आहे. विशेष म्हणजे, आरोपी वयाच्या ६७व्या वर्षीही एका ३० वर्षीय महिलेसोबत अत्याचार करताना दिसत असल्याचा दावा सरकारी वकिलांनी न्यायालयात केला आहे. त्यामुळे या प्रकरणाची गंभीरता आणखी वाढली आहे.
याशिवाय, या प्रकरणात आणखी काही धक्कादायक बाबी समोर येत आहेत. आरोपीने अनेक लोकांना ‘कस्तुरी’ दिल्याची माहिती समोर आली असून, ती मिळवण्यासाठी त्याने हरणाची बेकायदेशीर शिकार केल्याचा संशय आहे. तसेच, तो साप कुठून आणत होता, याचाही तपास पोलिसांकडून केला जात आहे. त्यामुळे या प्रकरणाचा विस्तार केवळ फसवणूक आणि अत्याचारापुरता मर्यादित न राहता वन्यजीव गुन्ह्यांपर्यंत पोहोचण्याची शक्यता आहे.
सरकारी वकिलांनी न्यायालयाकडे अधिक काळ पोलीस कोठडीची मागणी करताना सांगितलं की, या प्रकरणात अजूनही मोठ्या प्रमाणावर डिजिटल पुरावे गोळा करायचे आहेत, तसेच अनेक तक्रारी समोर येत असून त्यांची पडताळणी करणं आवश्यक आहे. या सर्व बाबींचा विचार करून न्यायालयाने अशोक खरात याला पाच दिवसांची पोलीस कोठडी सुनावली आहे.
दरम्यान, या प्रकरणामुळे संपूर्ण महाराष्ट्रात खळबळ उडाली असून, समाजात भीतीचं वातावरण निर्माण झालं आहे. अंधश्रद्धा, भोंदूपणा आणि त्यामागील गुन्हेगारीचे धागे किती खोलवर रुजलेले आहेत, याचं हे गंभीर उदाहरण मानलं जात आहे.पुढील तपासात आणखी कोणते धक्कादायक खुलासे होणार, याकडे संपूर्ण राज्याचं लक्ष लागलं आहे.
