दि.२९(पीसीबी)-यशवंतराव चव्हाण प्रतिष्ठानच्यावतीने माजी आ.शिवाजीराव पाटील कव्हेकर व प्रतिभाताई पाटील कव्हेकर यांना यशवंत वेणू पुरस्कार प्रदान करण्यात आला, त्याबद्दल त्यांचे अभिनंदन यशवंतराव चव्हाणांनी आपले सर्वस्व जीवन महाराष्ट्र व देशाला समर्पित केले तर वेणूताईंनी आपले जीवन यशवंतरावांसाठी समर्पित केले. गांधीजींच्या विचारावर प्रभावित होऊन त्यांचा फोटो दिल्‍ली दरबारी नेण्याचे काम वेणूताईंनी केले. तसेच भंग्याचे औक्षण करून त्याचा सन्मान करण्याचे कामही वेणूताईंनी केले. या कार्याबरोबरच यशवंतरावांचे बहुआयामी व्यक्‍तिमत्त्व चौफेर बाजूंनी पेलण्याचे काम वेणूताईंनी केले.
कुठल्याही जाती-धर्मांना प्राधान्य न देता निस्वार्थ भावनेने तब्बल 14 वर्षे राज्याचे नेतृत्त्व करणारे यशवंतराव चव्हाण व त्यांना साथ देणार्‍या वेणूताई व त्यांच्या विचारावर चालण्याचे काम डाव्या चळवळीत काम करणार्‍या कव्हेकर दांम्पत्यांनी केलेले आहे. त्यामुळे खर्‍या अर्थाने महाराष्ट्राच्या राजकारणात स्वतःचे व्हिजन ठेवून निष्कलंकपणे काम करणारे एकमेव कव्हेकर दांम्पत्य आहे असे प्रतिपादन अखिल भारतीय साहित्य संमेलनाचे माजी अध्यक्ष डॉ.श्रीपाल बसनीस यांनी केले.
यावेळी ते यशवंतराव चव्हाण प्रतिष्ठानच्यावतीने चिंचवड पुणे येथील अ‍ॅटो क्‍लस्टर सभागृहात आयोजित यशवंत वेणू पुरस्कार गौरव सोहळ्याच्या उद्घाटनप्रसंगी बोलत होते. यावेळी या कार्यक्रमाच्या अध्यक्षस्थानी ंस्वामी रामानंद तीर्थ मराठवाडा विद्यापीठ नांदेडचे माजी कुलगुरू डॉ.पंडीत विद्यासागर हे होते तर प्रमुख पाहुणे म्हणून पुणे येथील ज्येष्ठ समाजसेवक तथ पद्मश्री पुरस्कार विजेते गिरीष प्रभूणे, यशवंत वेणू पुरस्काराचे मानकरी माजी आ.शिवाजीराव पाटील कव्हेकर, लातूर जिल्हा परिषदेच्या माजी अध्यक्षा प्रतिभाताई शिवाजीराव पाटील कव्हेकर, अखिल भारतीय साहित्य महामंडळाचे प्रभारी कार्यवाह सुनिताराजे पवार, नारायण सूर्वे साहित्य कला अकादमीचे अध्यक्ष सुदाम भोरे, श्रमश्री बाजीराव सातपुते, उद्योजक विशाल पलांडे, ज्येष्ठ साहित्यिक नंदकुमार मुरडे आदी मान्यवर उपस्थित होते.
यावेळी पुढे बोलताना डॉ.श्रीपाल सबनीस म्हणाले की, यशवंतराव चव्हाण प्रतिष्ठानच्या माध्यमातून यापूर्वी काँग्रेसवाल्यांना पुरस्कार दिलेले आहेत. हे सत्कारमूर्ती योग्य आहेत. परंतु पहिल्यांदाच डाव्या विचारातून जनता दल व भाजपा पक्षात काम करणार्‍या कव्हेकर दांम्पत्यांना हा पुरस्कार प्रदान करण्यात आलेला आहे. कव्हेकरांनी सामाजिक, राजकीय कार्याबरोबरच आपल्या शैक्षणिक संस्थेच्या माध्यमातून 1800 कर्मचार्‍यांना नोकरीच्या माध्यमातून आधार देण्याचे काम केलेले आहे. त्यांचे सध्याचे काम भाजपा पक्षाच्या माध्यमातून असले तरी ते सेक्युलर व त्यांचे विचार सर्वसमावेशक आहेत. भगवत्गिता, बायबल या ग्रंथारोबरच कुराणाचे समर्थन करणारा पहिला माणूस म्हणजे कव्हेकर आहेत. यशवंतरावांची नीती सत्यावरती चालणारी असल्यामुळे त्याच विचाराने काम करण्याचे कार्य कव्हेकरांनी केलेले आहे. प्रतिभाताई कव्हेकर यांनीही कोरोनाच्या काळात लातूरच्या पाणी प्रश्‍नांवर चांगले काम केलेले आहे. याबरोबरच जिल्हा परिषदेच्या माध्यमातून महिला व बालकल्याण विभागाला न्याय देण्याचे काम केले. बचत गटाच्या माध्यमातून महिलांना उद्योगातून सक्षम करण्याचे कार्य केले. त्यांच्या या चौफेर कार्यामुळे लातूर जिल्हा परिषद देशात पहिली व राज्यात पहिली आणण्याचे काम केले असून राज्याचे 35 व केंद्राचे 50 लाखाचे बक्षीस लातूर जिल्हा परिषदेला मिळालेले आहे. त्यांनी आपल्या कार्यातून सात्विकता आणि सत्यता ही यशवंत निती आत्मसात केल्यामुळे त्यांची यापुढील कालावधीतही यशस्वीपणे प्रगती होईल. असा विश्‍वासही डॉ.श्रीपाल सबनीस यांनी यावेळी बोलताना व्यक्‍त केला.
कार्यक्रमाच्या प्रारंभी चिमुकल्या पिऊ औंथनकर या मुलींच्या शुभहस्ते वृक्षाला पाणी घालून कार्यक्रमाची सुरुवात करण्यात आली. प्रारंभी यशवंत गिताचे सादरीकरण कामगार भूषण राजेंद्र वाघ यांनी केले तर यशवंतराव चव्हाण यांची वाटचाल विषद करण्याचे काम श्रमश्री बाजीराव सातपुते यांनी केले. कार्यक्रमाची भूमिका यशवंतराव चव्हाण प्रतिष्ठानचे अध्यक्ष पुरुषोत्तम सदाफुले यांनी विषद केली. या पुरस्कार वितरणानंतर सत्काराला उत्तर देण्याचे कार्यही सर्व सत्कारमूर्तींनी केले. यावेळी या कार्यक्रमाला मराठवाडा मित्रमंडळाचे अध्यक्ष अरूण पवार, महाराष्ट्र राज्य नागरी बँक असोसिएशनचे अध्यक्ष भाऊ भगवंत कड, एसटी महामंडळाचे माजी सरव्यवस्थापक डी.टी.जाधव, जेएसपीएमचे कार्यकारी संचालक रंजितसिंह पाटील कव्हेकर, प्रकाश इंगोले, सागर काळभोर यांच्यासह विविध क्षेत्रातील मान्यवरांची उपस्थिती होती. कार्यक्रमाचे सूत्रसंचालन प्रा.दिगंबर ढोकले यांनी केले तर आभार संगिता झिंजुरके यांनी मानले.
यशवंतरावांच्या विचारावर चालण्याचे काम कव्हेकरांनी केले – डॉ.पंडित विद्यासागर
यशवंत वेणू या पुरस्काराची निवड सार्थ झाली असून त्याचा प्रदान सोहळाही देखना झाला. त्याबद्दल कव्हेकर दांम्पत्यांचे अभिनंदन. मी माझ्या कार्यकालामध्ये यशवंतराव चव्हाणांना ऐकले आणि अनुभवलेले आहे. माझ्या कॉलेज जीवनातील गुणवत्तेबद्दल त्यांच्याशी शेकहँड करण्याचा योग आला. तो स्पर्श आजही जाणवतो आहे. त्यांनी त्यांच्या राजकीय कार्यकालामध्ये तब्बल चार खात्याचे मंत्रीपद व मुख्यमंत्री म्हणून यशस्वीपणे काम केलेले आहे. संरक्षण खात्याचे आधुनिकीकरण केलेले आहे. त्यांचे शैक्षणिक विचारही दिशा देणारे ठरलेले आहे आणि त्याच विचारावर कव्हेकर परिवाराची वाटचाल सुरू आहे. हे त्यांच्या लोकयोगी या आत्मचरित्रातून समोर आलेले आहे. त्यांचे गुण अवर्णनीय आहेत. त्यांचे आरोग्याबाबतचे विचार, प्रामाणिकता व इतर सर्व गुणांची कदर मोठी आहे. त्यातच त्यांच्या सहचारिणी प्रतिभाताईंचे काम तोलामोलाचे आहे. त्यामुळे या पुढील कालावधीतही त्या आपल्या अनुभावातून दिशादर्शक काम करतील.असे प्रतिपादन नांदेड विद्यापीठाचे माजी कुलगुरू डॉ.पंडीत विद्यासागर यांनी केले.
यशवंतराव चव्हाण प्रतिष्ठानची प्रतिष्ठा वाढविणारा कव्हेकरांचा सन्मान आहे – पद्मश्री गिरीष प्रभूणे
कव्हेकरांनी जेएसपीएम शिक्षण संस्थेच्या माध्यमातून वंचितांना शिक्षणाच्या प्रवाहात आणण्याचे काम केले. तसेच आर्यवीर दलाचे राष्ट्रीय अध्यक्ष डॉ.देववृत्तजी आचार्य यांच्या मार्गदर्शनाखाली आर्षयोग प्रतिष्ठानच्या माध्यमातून अनेकांना योगाच्या प्रवाहात आणण्याचे काम कव्हेकर यांनी केलेले आहे. तसेच आत्महत्याग्रस्त कुटुंबांना तातडीची मदत करून त्यांच्या पाल्यांना शिक्षणासाठी दत्तक घेण्याचे काम केलेले आहे. बचत गटाच्या महिलांना सक्षम करण्याचे कामही कव्हेकर दांम्पत्यांनी केलेले आहे. याबरोबरच अनेक सामाजिक प्रश्‍न मार्गी लावण्याचे काम त्यांनी केलेले आहे. या त्यांच्या कार्यातून महाराष्ट्राच्या नेतृत्त्वाचे गुण या परिवारामध्ये दिसून येतात. त्यामुळे यशवंत वेणू गौरव पुरस्कार हा यशंवतराव चव्हाण प्रतिष्ठानचा सन्मान वाढवणारा ठरलेला आहे. त्यामुळे हा पुरस्कार त्यांच्या भावी कार्याला चालना देणारा ठरेल, अशी अपेक्षाही पद्मश्री गिरीष प्रभूणे यांनी यावेळी बोलताना व्यक्‍त केली.
