दि.१८(पीसीबी)-मोठा पक्ष असलेल्या भाजपनं सुरु केलेला पक्षविस्तार शिंदेसेनेसाठी चिंतेचा आणि अडचणीचा विषय ठरत आहे. शिंदेसेनेची ताकद असलेल्या भागांमध्ये भाजपनं विरोधी पक्षातील नेत्यांना गळाला लावण्याचा धडाका लावला आहे. त्यामुळे शिंदेसेनेत अस्वस्थता आहे. याचे पडसाद आज कॅबिनेट बैठकीत उमटले. शिंदेसेनेच्या सगळ्या मंत्र्यांनी आज झालेल्या कॅबिनेट बैठकीवर बहिष्कार टाकला. यानंतर सेनेचे सगळे मंत्री आता मुख्यमंत्री फडणवीस यांच्या भेटीला पोहोचले. पण फडणवीस यांनी सेनेच्या मंत्र्यांची कानउघाडणी केली.
भाजपकडून सेनेच्या माजी नगरसेवक, पदाधिकाऱ्यांना स्वत:कडे घेत आहेत. त्यांचे पक्षप्रवेश उरकले जात आहेत. ज्यांच्या विरोधात निवडणुका लढवल्या, त्याच उमेदवारांना भाजप आपल्याकडे घेत आहेत. त्यामुळे शिंदेसेनेत प्रचंड अस्वस्थता आहे. युतीचा धर्म पाळला जात नाही, अशी शिंदेसेनेची तक्रार आहे. निधी मिळवण्यासाठीही शिंदेसेनेच्या आमदारांना कसरत करावी लागत आहे. या सगळ्यामुळे शिंदेसेनेची गोची झाली आहे. त्यामुळेच शिंदेसेनेचे मंत्री आज फडणवीसांच्या भेटीला गेले होते.
कल्याण-डोंबिवली, अंबरनाथ, बदलापूर-कुळगावमध्ये भाजपने शिंदेसेनेचे अनेक माजी नगरसेवक गळाला लावले आहेत. त्यांना पक्षप्रवेश दिले आहेत. त्यावरुन शिंदेसेनेनं मुख्यमंत्री फडणवीस यांच्याकडे आक्षेप नोंदवला. त्यावरुन फडणवीसांनी शिंदेसेनेच्या मंत्र्यांची चांगलीच कानउघाडणी केली. उल्हासनगरमध्ये सुरुवात तुम्ही केली. तुम्ही करणार असाल तर चालवून घ्यायचं आणि भाजपनं केलं तर चालणार नाही, असं होणार नाही, अशा स्पष्ट शब्दांत फडणवीसांनी शिंदेसेनेच्या मंत्र्यांना झापलं.
