माजी नगरसेवक विजय शिंदे यांचा प्रशासनावर हल्लाबोल
पिंपरी, दि. ८ – शहराच्या विकासासाठी महत्त्वाकांक्षी मानल्या जाणाऱ्या महा मेट्रोच्या कामामुळे नागरिकांना आता जीवघेणा अनुभव येत आहे. भक्ती-शक्ती चौक, निगडी ते चिंचवड स्टेशन चौक या मार्गावर सुरू असलेल्या कामामुळे रस्त्याची अक्षरशः चाळण झाली आहे. मोठे खड्डे, धूळ आणि सततची वाहतूक कोंडी यामुळे नागरिक त्रस्त झाले आहेत. महामेट्रोच्या निष्काळजीपणामुळे हा रस्ता अपघातांना निमंत्रण देणारा ठरत असून, माजी नगरसेवक विजय शिंदे यांनी मेट्रो आणि पिंपरी चिंचवड महापालिका अधिकारी यांच्यासोबत प्रत्यक्ष चिंचवड स्टेशन ते निगडी आणि निगडी- आकुर्डी- चिंचवड स्टेशन रस्त्यांची पाहणी केली. तसेच, प्रशासनावर जोरदार हल्लाबोल करत तीव्र आंदोलन छेडण्याचा इशारा दिला आहे.
या गंभीर प्रश्नावर आता माजी नगरसेवक विजय शिंदे यांनी आक्रमक पवित्रा घेतला आहे. त्यांनी थेट महापालिकेचे व मेट्रोच्या वरिष्ठ अधिकाऱ्यांसोबत रस्त्याची पाहणी करून प्रशासनावर जोरदार हल्लाबोल केला. “मेट्रोचा हा मनमानी कारभार थांबला पाहिजे. नागरिकांच्या जिवाशी खेळण्याचा अधिकार तुम्हाला कोणी दिला?” अशा कठोर शब्दांत त्यांनी आपला संताप व्यक्त केला. यावेळी, पिंपरी चिंचवड महापालिकेचे सह शहर अभियंता बापूसाहेब गायकवाड, कार्यकारी अभियंता अभिमान भोसले, विपिन थोरमोडे, महामेट्रो चे प्रकल्प अधिकारी वाय. बी. सिंग, धनंजय योगानंद आदि उपस्थित होते.
अपघात आणि वाहनांचे नुकसान
मेट्रोच्या कामामुळे रस्त्यावर ठिकठिकाणी खड्डे पडले आहेत, जे वेळेवर बुजवले जात नाहीत. यामुळे दुचाकीस्वार घसरून पडण्याचे प्रकार वाढले असून, अनेक नागरिक जखमी झाले आहेत. खड्ड्यांमुळे वाहनांचे मोठे नुकसान होत आहे. टायर पंक्चर होणे, सायलेंसर तुटणे किंवा इतर भागांचे नुकसान होणे असे प्रकार नित्याचेच झाले आहेत, त्यामुळे नागरिकांना आर्थिक भुर्दंड सोसावा लागत आहे. हा रस्ता औद्योगिक वसाहती, शैक्षणिक संस्था आणि रुग्णालयांना जोडणारा असल्याने दररोज हजारो वाहने यावरून ये-जा करतात. मेट्रो प्रशासनाच्या निष्काळजीपणामुळे नागरिकांना शारीरिक आणि मानसिक त्रास सहन करावा लागत आहे.
वाहतूक कोंडी आणि प्रवाशांची गैरसोय..
मेट्रोच्या कामामुळे रस्त्याचा मोठा भाग व्यापला गेल्याने उर्वरित रस्ता वाहतुकीसाठी खूपच अरुंद झाला आहे. यामुळे वाहनांची मोठी गर्दी होऊन वाहतूक कोंडीची समस्या गंभीर झाली आहे. सकाळी आणि संध्याकाळी कामाच्या वेळी ही कोंडी अधिक त्रासदायक ठरते, ज्यामुळे कामावर वेळेवर पोहोचणे कठीण होते. सर्वात संतापजनक बाब म्हणजे, महामेट्रोने पावसाळ्यापूर्वी रस्त्याची दुरुस्ती केली नाही. यामुळे पालखी सोहळ्यादरम्यान वारकऱ्यांची मोठी गैरसोय झाली. त्यांना चिखल आणि साचलेल्या पाण्यातून जावे लागले, ज्यामुळे मेट्रो प्रशासनाची असंवेदनशीलता स्पष्ट दिसून येते.
तीव्र आंदोलन करण्याचा इशारा..
या वेळी शिंदे यांनी अनेक सूचना केल्या. रस्त्याची तातडीने दुरुस्ती करून सर्व खड्डे बुजवा. कामाच्या ठिकाणी जबाबदार अधिकाऱ्यांचे नाव आणि संपर्क क्रमांक स्पष्टपणे दर्शनी भागात लावा. यापुढे रस्त्यावरील खड्ड्यांमुळे अपघात झाल्यास त्याची संपूर्ण जबाबदारी मेट्रो प्रशासनाची असेल, असे सांगत या मागण्या मान्य न झाल्यास, तीव्र आंदोलन करण्याचा इशाराही विजय शिंदे यांनी दिला आहे. नागरिकांच्या सुरक्षिततेचा प्रश्न तातडीने मार्गी लावण्यासाठी त्यांनी प्रशासनाला कठोर शब्दांत सुनावले आहे. मेट्रोच्या या कामामुळे शहराची शोभा वाढण्याऐवजी नागरिकांचा जीव धोक्यात येत असल्याचे भयावह चित्र यानिमित्ताने समोर आले आहे.
महामेट्रोच्या कामामुळे निगडी ते चिंचवड रस्त्याची झालेली दुरवस्था आणि त्यामुळे नागरिकांना होणाऱ्या त्रासावर माजी नगरसेवक विजय शिंदे यांनी तीव्र संताप व्यक्त केला आहे. ते म्हणाले, “विकासकामांना आमचा विरोध नाही, पण मेट्रो प्रशासनाच्या निष्काळजीपणामुळे रस्त्यावर मोठे खड्डे पडले आहेत, ज्यामुळे अपघात वाढले आहेत. तसेच, वाहतूक कोंडीमुळे नागरिकांचा वेळ आणि पैसा वाया जात आहे. प्रशासनाकडे अनेक तक्रारी करूनही कोणतीही कारवाई होत नाही. जर मेट्रो प्रशासनाने तातडीने उपाययोजना केल्या नाहीत, तर आम्ही शांत बसणार नाही. नागरिकांना सोबत घेऊन आम्ही तीव्र आंदोलन करू.”
