दि.१३(पीसीबी)-कर्नाटकातील अलंद विधानसभा मतदारसंघातील गाजलेल्या ‘मत चोरी’ प्रकरणात कर्नाटक पोलिसांच्या विशेष तपास पथकाने (SIT) मोठी कारवाई करत न्यायालयात आरोपपत्र दाखल केले आहे. या आरोपपत्रात माजी भाजप आमदार सुभाष गुट्टेदार आणि त्यांचा मुलगा यांच्यासह एकूण सात जणांची नावे नमूद करण्यात आली आहेत.
SIT च्या तपासानुसार, अलंद मतदारसंघात हजारो मतदारांची नावे बेकायदेशीररित्या मतदार यादीतून हटवण्यात आली होती. काही प्रकरणांमध्ये प्रत्येक मतदार नाव हटवण्यासाठी पैसे दिल्याचे गंभीर आरोपही तपासात समोर आले आहेत. या प्रकारामुळे लोकशाही प्रक्रियेवर गंभीर प्रश्नचिन्ह उपस्थित झाले होते.
या प्रकरणाची गंभीर दखल घेत कर्नाटक सरकारने स्वतंत्र SIT ची स्थापना केली होती. सखोल तपास, साक्षी, कागदपत्रे आणि डिजिटल पुरावे गोळा केल्यानंतर आता न्यायालयात आरोपपत्र दाखल करण्यात आले आहे. SIT कडे या प्रकरणात पुरेसे पुरावे उपलब्ध असल्याचा दावा करण्यात आला आहे.
लोकशाही व्यवस्थेला धक्का देणाऱ्या या प्रकारात राजकीय हस्तक्षेप आणि संगनमत झाले का, याचा तपासही करण्यात आला असून, पुढील कायदेशीर प्रक्रिया न्यायालयीन स्तरावर सुरू होणार आहे.
दरम्यान, या प्रकरणावर राज्याच्या राजकारणात तीव्र प्रतिक्रिया उमटण्याची शक्यता असून, आगामी काळात आणखी काही नावे समोर येण्याची शक्यता नाकारता येत नाही, असे सूत्रांनी सांगितले.
