शंकर जगताप यांच्या शहराध्यक्षपदी निवडीला विरोध
पिंपरी, दि. १९ (पीसीबी) : भाजपकडून जिल्हा व शहराध्यक्ष निवड करण्यात आली. यात शंकर जगताप यांची पिंपरी – चिंचवड शहराध्यक्षपदी निवड झाली. हा प्रकार म्हणजे जगताप कुटुंबाला झुकतं माप असून यातून ‘परिवारवाद’ दिसून येतो, असे म्हणत भाजपचे पिंपरी – चिंचवड शहर संघटन सरचिटणीस अमोल थोरात यांनी भाजपला घरचा आहेर दिला आहे. त्यामुळे शहर भाजपमध्ये दुफळी निर्माण झाली आहे.
अमोल थोरात यांनी याबाबत पक्षाच्या वरिष्ठ नेत्यांकडे नाराजी व्यक्त केली आहे. त्यांनी दिलेल्या निवेदनात नमूद केले आहे की, राज्यातील भाजपच्या शहराध्यक्षपदी नव्याने नियुक्त करण्यात आलेल्या आहेत. त्यात पिंपरी -चिंचवड शहराध्यक्षपदी दिवंगत आमदार लक्ष्मण जगताप यांच्या बंधू शंकर जगताप यांची निवड जाहीर करण्यात आली. लक्ष्मण जगताप यांच्या निधनानंतर त्यांच्या पत्नी अश्विनी जगताप यांना भाजपने पोटनिवडणुकीत संधी दिली. त्यावेळी पक्ष आणि शहरातील सर्व पदाधिकारी व कार्यकर्ते त्यांच्या सोबत राहिल्याने अश्विनी जगताप आमदार झाल्या. असे असतानाच जगताप कुटुंबातील शंकर जगताप यांना भाजपने प्रदेश पातळीवर संधी दिली. भाजप संघटनेत अवघे वर्ष झाले नसताना आता शहराध्यक्षपदी त्यांची निवड केली. या निवडीमुळे पक्षाच्या धोरणांबाबत चर्चा सुरू झाली आहे.
मा. पंतप्रधान नरेंद्र मोदी यांनी राजकीय पक्षांमधील कुटुंबवादाला नेहमीच विरोध केला आहे. पार्टी विथ डिफरन्स असे म्हणत भाजपने देखील एकाच कुटुंबात अनेक पदे किंवा एकाच कुटुंबातील व्यक्तींना वारंवार संधी देण्याचे टाळले आहे. असे असतानाच जगताप कुटुंबातील व्यक्तींना सतत झुकते माप दिले जाते आहे.
लोकांचे, लोकांनी, लोकांसाठी केलेले तंत्र म्हणजे लोकतंत्र (लोकशाही), या तत्वानुसार भाजप संघटना काम करत आहे, असे मा. पंतप्रधान नरेंद्र मोदी सातत्याने सांगत असतात. मात्र, त्यांच्या संदेशाकडे दुर्लक्ष करून पिंपरी चिंचवड शहराध्यक्षपदी शंकर जगताप यांची निवड झाली. एकाच कुटुंबाकडे विविध पदे दिली जात आहेत. यातून भाजपच्या धोरण आणि तत्वांना तिलांजली दिली जाते आहे. शहरातील जुन्या व एकनिष्ठ असलेल्या पदाधिकारी व कार्यकर्ते यांना हा निर्णय न पटण्यासारखाआहे. शहरात पक्षाचे अस्तित्व टिकवून पक्षवाढीसाठी सतत झटणाऱ्यांची त्यामुळे घुसमट होत आहे.
