दि.३ (पीसीबी) -चंद्रपूर जिल्ह्यात मतदारयादीत एका बापाला 56 मुलं दाखवली. भाजपने मत चोरी करून महाराष्ट्रात 132 आमदार निवडून आणल्याचा गंभीर आरोप काँग्रेस नेते विजय वडेट्टीवार यांनी केला. मोहन भागवत 3 मुलं पैदा करा असे सांगतात. मग हे कास शक्य आहे असा संतप्त सवाल त्यांनी उपस्थित केला आहे महाराष्ट्रातील मतदारचोरांना धडा शिकावण्यासाठी ही सभा घेतली जात असल्याचे वडेट्टीवार म्हणाले. राज्य सरकारने मराठा ओबीसी यांना झुंजवल्याचा आरोपही त्यांनी केला. काँग्रेस प्रदेशाध्यक्ष हर्षवर्धन सपकाळ यांच्या नेतृत्वात ‘वोट चोर, गद्दी छोड’ या काँग्रेसच्या कॅम्पेनची आज कामठी येथून सुरवात झाली. यावेळी बोलताना हर्षवर्धन सपकाळ यांनीही जोरदार हल्लाबोल केला. सपकाळ म्हणाले की, राष्ट्रीय स्वयंसेवक संघाचे सरसंघचालकमोहन भागवत यांनी मोदींना खुर्ची खाली करण्यास सांगितलं आहे. देशात मध्यवर्ती निवडणूका लागणार असल्याचा दावाही सपकाळ यांनी केला.
दुसरीकडे, बिहारमध्ये काँग्रेस नेते राहुल गांधी आणि तेजस्वी यादव यांची मतदार हक्क यात्रा पार पडली. राहुल गांधी यांनी आता समारोपाच्या सभेत मोठी घोषणा केली. राहुल गांधी मत चोरीवरून भाजपला सतत कोंडीत पकडत आहेत. दरम्यान, त्यांनी आता म्हटले आहे की आम्ही महादेवपुरात अणुबॉम्ब टाकला, आता हायड्रोजन बॉम्ब येणार आहे. मोदी देशाला तोंड दाखवू शकणार नाहीत. बिहारमध्ये एसआयआर आणि मत चोरीविरुद्ध 17 ऑगस्ट रोजी ही यात्रा सुरू झाली होती. ही यात्रा सासाराम येथून सुरू झाली. बिहारमधील सुमारे 25 जिल्ह्यांमधून 1300 किमी अंतर कापून ही यात्रा आता पाटण्यात संपली.
राहुल गांधी यांनी यात्रेच्या समारोपाच्या वेळी सांगितले की, महाराष्ट्रात राष्ट्रवादी काँग्रेस, काँग्रेस आणि शिवसेनेकडून निवडणुका चोरल्या गेल्या. लोकसभा निवडणुकीनंतर मतदार यादीत सुमारे 1 कोटी नवीन मतदार जोडले जातात. नवीन मतदार येतात आणि मतदान करतात. लोकसभेत आमच्या युतीला मिळालेली मते विधानसभेतही सारखीच होती. सर्व नवीन मते भाजपच्या खात्यात गेली. आम्ही लोकसभा जिंकली पण विधानसभेत आमचे तिन्ही बलाढ्य पक्ष नामशेष झाले.
राहुल गांधी पुढे म्हणाले, कारण निवडणूक आयोग आणि भाजपने मिळून मते चोरली. त्यानंतर आम्ही स्पष्टपणे दाखवले की महादेवपुरातील एका भागात 1 लाखाहून अधिक बनावट मतदार होते. निवडणूक आयोगाने आम्हाला मतदार यादी, व्हिडिओग्राफी दिली नाही. राहुल गांधी म्हणाले, आता भाजपने ही महत्त्वाची गोष्ट ऐकावी. भाजपबद्दल ते म्हणाले, तुम्ही अणुबॉम्बचे नाव ऐकले आहे, त्यापेक्षा मोठा हायड्रोजन बॉम्ब आहे. आम्ही महादेवपुरात अणुबॉम्ब टाकला. भाजपवाल्यांनो, तयार व्हा, हायड्रोजन बॉम्ब येत आहे. मत चोरीचे सत्य संपूर्ण देशाला कळणार आहे. हायड्रोजन बॉम्ब नंतर, मोदी या देशाला तोंड दाखवू शकणार नाहीत.
