मुंबई,दि.०३(पीसीबी) – शनिवारी सकाळी कारवरील नियंत्रण सुटल्याने माजी आमदार नरेंद्र मेहता यांचा मुलगा तक्षिल लॅम्बॉर्गिनी याची कार वांद्रे-वरळी सी लिंकवर दुभाजक आणि संरक्षक कठड्याला धडकली. या अपघातामध्ये लॅम्बॉर्गिनी कारचे प्रचंड नुकसान झाले. तक्षिलही जखमी झाला. दरम्यान निष्काळजीपणे आणि बेजबाबदारपणे कार चालविल्याप्रकरणी तक्षिल याच्या विरोधात वरळी पोलीस ठाण्यात गुन्हा दाखल करण्यात आला आहे.
वरळी पोलिसांचे पथक शनिवारी सकाळी नाकाबंदी लावून तपासणी करीत असताना त्यांना पोलीस नियंत्रण कक्षातून वांद्रे वरळी सी लिंकवर अपघात झाल्याची माहिती मिळाली. ते घटनास्थळी पोहचले. त्यावेळी लॅम्बॉर्गिनी कार दुभाजक आणि संरक्षक कठड्याला आदळून तिचे प्रचंड नुकसान झाल्याचे दिसले. पोलिसांनी कारचालकाकडे चौकशी केली असता त्याने तक्षिल नरेंद्र मेहता अशी ओळख सांगितली.
कार वेगात असल्याने आणि सकाळी पाऊस असल्याने रस्ते निसरडे झाले होते. यामुळे नियंत्रण सुटल्याने अपघात घडल्याचे त्याने सांगितले. तक्षिल याचा एक हात भाजला होता, तर अपघातानंतर एअरबॅग उघडल्याने दुसऱ्या हातालाही दुखापत झाल्याचे त्याने सांगितले. पोलिसांनी पोद्दार रुग्णालयात नेऊन त्याची वैद्यकीय तपासणी केली, तसेच त्याच्या हातावर उपचारही करण्यात आले. वाहतुकीला अडथळा होत असल्याने ही कार तात्काळ टोईंग करून हटविण्यात आली. या प्रकरणात अधिक तपास सुरू असल्याचे पोलिसांनी म्हटले आहे.
