दि.०६(पीसीबी) -आगामी निवडणुकीसाठी पिंपरी-चिंचवड महापालिका प्रशासनाने प्रसिद्ध केलेल्या प्रारूप प्रभागरचनेवर आलेल्या ३१८ हरकती व सूचनांवरील शिफारशी विचारात घेऊन अंतिम प्रभागरचना आज जाहीर करण्यात आली.प्रभाग रचना करताना आलेल्या सर्व हरकती सुचनांपैकी फक्त दोन पूर्णतः आणि तीन अंशतः हरकती-सुचनांचा विचार कऱण्यात आला आहे. हद्दी बाबत पूर्णतः मान्य हरकतीप्रमाणे हद्दीत अंशतः बदल झालेले प्रभाग १ व १२ आणि ६ व ७ चा समावेश आहे.
अंशतः मान्य तीन हरकतीप्रमाणे हद्दीत अंशतः बदल झालेले प्रभाग २४ आणि २५ चा समावेश आहे. इतर सर्व हरकती आणि सुचना अमान्य करण्यात आल्याचे महपालिकेच्या निवडणूक विभागाने दिलेल्या प्रसिध्दीपत्रात म्हटले आहे.राज्य निवडणूक आयोगाने अंतिम प्रभागरचनेला मान्यता दिली. २२ ऑगस्टला चार सदस्यीय पद्धतीने ३२ प्रभागांची प्रारूप रचना जाहीर केली होती. या प्रभागरचनेवर ३१८ हरकती आल्या होत्या. त्यामध्ये माेरवाडी, शाहूनगर, संभाजीनगर या प्रभागाच्या रचनेवर सर्वाधिक म्हणजे ११५, त्याखालोखाल प्रभाग क्रमांक एक चिखली गावठाण, मारेवस्ती या प्रभागाबाबत ९८ आणि महेशनगर, संत तुकारामनगर व वल्लभनगर प्रभागाबाबत ३१ हरकती आल्या होत्या. ३१८ हरकतींवर राज्याचे सहकार आणि विपणन विभागाचे प्रधान प्रवीण दराडे यांनी १० सप्टेंबर रोजी सुनावणी घेतली होती. एकाच दिवशी सुनावणीची प्रक्रिया पूर्ण झाली होती.
