‘कुलकर्णी यांचा मतदारसंघ गेला. टिळकांचा गेला. आता नंबर बापटांचा का?’
पुणे, दि. ६ (पीसीबी) : कसबा पेठ विधानसभा मतदारसंघाच्या आमदार मुक्ता टिळक यांच्या निधनानंतर रिक्त झालेल्या जागेवर पोटनिवडणूक होत आहे. यासाठी २६ फेब्रुवारीला मतदान होणार आहे. कसब्यात उमेदवारी देताना भाजपला मोठी कसरत करावी लागली. अखेर उमेदवारीची माळ माजी स्थायी समिती अध्यक्ष हेमंत रासने यांच्या गळ्यात पडली. पण आता टिळकांच्या घरात उमेदवारी न देता भाजपने घराबाहेरील उमेदवार दिल्याने मोठी नाराजी उफाळल्याचे चित्र आहे.
मुक्ता टिळक यांचे पती शैलेश टिळक यांनी देखील याबात नाराजी व्यक्त केली होती. त्यानंतर आता पुन्हा भाजपमधील नाराजी नाट्य उघड झाले आहे. ‘कुलकर्णी यांचा मतदारसंघ गेला. टिळकांचा गेला. आता नंबर बापटांचा का?’ अशा आशयाचा मजकूर लिहिलेले बॅनर्स कसबापेठेत लागले आहेत. त्यामुळे कसब्यात भाजपविरोधातील नाराजी उफाळून आल्याचे दिसत आहे.
कसबा पेठ पोटनिवडणुकीसाठी आज हेमंत रासने हे उमेदवारी अर्ज दाखल करणार आहेत. त्यापूर्वीच कसब्यात ‘कुलकर्णींचा मतदारसंघ गेला… टिळकांचा मतदारसंघ गेला… आता नंबर बापटांचा का? समाज कुठवर सहन करणार?’ अशा आशयाचे बॅनर कसब्यात लागले आहेत. या बॅनरवर कोणाचेही नाव नसून कसब्यातील एक जागरूक मतदार इतकेच लिहलेले आहे.
भाजपने उमेदवारी देताना काही सर्वे केले होते, त्यात भाजपला ही पोटनिवडणूक सोपी नाही, असा निष्कर्ष निघाल्याची माहिती आहे. त्यातही समोर महाविकास आघाडी रवींद्र धंगेकर यांच्यासारखा तगडा उमेदवार देण्याच्या तयारीत असल्याने भाजपने लोकांत असणारा चेहरा उमेदवार देण्याचे ठरवले आणि म्हणूनच शैलेश टिळक यांचा पत्ता कट करण्यात आल्याचं बोललं जात आहे. मात्र, यातून आता ब्राम्हण समाजच भाजपवर नाराज झाला आहे.
दरम्यान, २०१९ च्या विधानसभा निवडणुकीत कोथरूडच्या स्टँडिंग आमदार मेधा कुलकर्णी यांचे तिकीट कपात तत्कालीन भाजप प्रदेशाध्यक्ष चंद्रकांत पाटील यांनी निवडणूक लढवली होती. तर आता या पोटनिवडणुकीत टिळकांचे तिकीट कपात ब्राम्हण समाजाचे प्रतिनिधित्व कमी करण्याचा डाव असल्याचा आरोप भाजपवर केला जात आहे. दुसरीकडे आजारी असलेले भाजप खासदार गिरीश बापट यांनाही डावलून येणाऱ्या लोकसभा निवडणुकीत भाजप नवीन चेहरा देण्याचा तयारीत असल्याने असे बॅनर कसब्यात लागले आहेत. आजारी असतानाही राज्यसभेच्या निवडणुकीत मतदान करण्यासाठी मुक्ता टिळक मतदानाला मुंबईत आल्या होत्या. रुग्णवाहिकेतून त्या आल्या होत्या. पक्षासाठी एवढी निष्ठा दाखवूनही त्यांच्या कुटुंबीयांना का डावलले गेले आहे? असा प्रश्न कसब्यात विचारला जात आहे. यावरूनच शैलेश टिळक यांनी उघड नाराजी बोलून दाखवली होती.
ब्राम्हण महासंघाची भाजपवर टीका –
जगताप कुटुंबाला न्याय आणि टिळक कुटुंबावर अन्याय आधी मेधा ताई, नंतर देवेंद्रजी आणि आत्ता टिळक कुटुंबीय यांना संधी नाकारण म्हणजेच भाजपला काही जातींची केवळ मते हवी असतात त्या जाती नकोच असतात, अशी टीका ब्राम्हण महासंघाचे आनंद दवे यांनी केली आहे. पक्षाचे काम करणे हे जेव्हा हेटाळणीचे असायचे, लोक चिडवायचे तेव्हा ज्यांनी पक्ष वाढवला आज त्यांनाच खड्ड्यात ढकलले जात आहे. खुल्या प्रवर्गाचा आवाज दाबण्याचा आज पुन्हा प्रयत्न झाला आहे. सर्वच जातींना योग्य प्रतिनिधित्व मिळाले पाहिजे, असेही आनंद दवे म्हणाले.
