पिंपरी, दि. ५ – पिंपरी चिंचवड महापालिका आरोग्य विभागाकडून ‘स्वच्छ भारत मिशन’ अंतर्गत ‘हर घर तिरंगा, हर घर स्वच्छता’ या विशेष मोहिमेच्या माध्यमातून शहरात देशप्रेम आणि स्वच्छतेचा जागर करण्यात येत आहे. ही तीन टप्प्यांत राबविण्यात येणारी विशेष मोहीम २ ऑगस्टपासून सुरू झाली असून १५ ऑगस्ट २०२५ पर्यंत राबविली जाणार आहे.पहिला टप्पा २ ऑगस्टला सुरू झाला असून तो ७ ऑगस्ट २०२५ ला संपणार आहे. या टप्प्यात शहरातील शाळांमध्ये, सार्वजनिक ठिकाणी व पर्यटनस्थळांवर तिरंग्याची चित्ररचना, रांगोळी आणि स्वच्छता उपक्रमांचे आयोजन करण्यात येणार आहे. यामध्ये विद्यार्थ्यांमध्ये देशभक्तीची भावना वाढवण्यासोबतच स्वच्छतेचे महत्त्वही देखील अधोरेखित होणार आहे.
या मोहिमेचा दुसरा टप्पा ९ ते १२ ऑगस्ट २०२५ या काळात राबवला जाणार असून यामध्ये तिरंगा मेळा, तिरंगा कॉन्सर्ट, पर्यावरणपूरक तिरंगा असे विविध उपक्रम राबवले जाणार आहेत. तिरंगा मेळा यामध्ये स्थानिक उद्योजकांना प्रोत्साहन देणारा आणि ‘वोकल फॉर लोकल’ चा संदेश देणारा हा उपक्रम तिरंग्याच्या माध्यमातून राष्ट्रनिर्माणात स्थानिक योगदान अधोरेखित करण्यासाठी राबविण्यात येणार आहे. तिरंगा कॉन्सर्टमध्ये देशभक्तीपर गीते, सांस्कृतिक सादरीकरणे यांच्याद्वारे तिरंग्याबद्दलचा अभिमान जागवला जाणार आहे. तर, पर्यावरणपूरक तिरंगा उपक्रमाद्वारे प्लास्टिकपासून दूर राहून पर्यावरणस्नेही कापडाचा व पुनर्वापर करता येणाऱ्या साहित्याचा वापर करून तिरंगा बनवण्याचा निर्धार नागरिकांमध्ये निर्माण करण्यात येत आहे.
१३ ऑगस्ट ते १५ ऑगस्ट २०२५ या काळात मोहिमेचा तिसरा टप्पा राबवण्यात येत असून यामध्ये शहरातील स्वच्छतेशी निगडित महत्त्वाच्या ठिकाणी ध्वजारोहण करून त्या जागांचे संवर्धन आणि गौरव केला जाणार आहे.
जनजागृतीपर विविध उपक्रम राबवले जाणार
• घरोघरी जाऊन कचरा स्वच्छतेची जनजागृती
• कचरा विलगीकरणाचे महत्त्व समजावणे
• प्लास्टिकऐवजी पर्यावरणपूरक कापडी पिशव्यांचा वापर करण्यास प्रोत्साहन देणे
१५ ऑगस्टनंतर ध्वज संकलन उपक्रम
स्वातंत्र्य दिनानंतर नागरिकांनी वापरलेले राष्ट्रध्वजाचे संकलन करण्याचे नियोजन पिंपरी चिंचवड महापालिकेने केले आहे. तरी नागरिकांनी त्यांनी वापरलेले राष्ट्रध्वज आर.आर.आर. (रिड्युस, रीयुज, रिसायकल) केंद्रांमध्ये जमा करावेत, असे आवाहन महापालिका प्रशासनाकडून करण्यात येत आहे.
‘हर घर तिरंगा, हर घर स्वच्छता’ अभियानामध्ये शहरातील प्रत्येक नागरिकाने सहभागी व्हावे. तसेच पिंपरी चिंचवड शहराच्या स्वच्छतेसाठीही नागरिकांचा सहभाग महत्त्वाचा आहे. स्वच्छ सर्वेक्षण २०२६ मध्ये शहर स्वच्छतेत देशात अव्वल क्रमांकावर नेण्यासाठी महापालिकेला सर्वतोपरी सहकार्य करावे.
— शेखर सिंह, आयुक्त तथा प्रशासक, पिंपरी चिंचवड महापालिका
‘स्वच्छ भारत मिशन’ अंतर्गत स्वातंत्र्याचा अमृतमहोत्सव साजरा करताना ‘हर घर तिरंगा, हर घर स्वच्छता’ या मोहिमेचे नियोजन पिंपरी चिंचवड महापालिकेच्या आरोग्य विभागाने केले आहे. या मोहिमेमुळे नागरिकांमध्ये देशभक्तीची भावना वाढवण्यासोबतच स्वच्छतेचे महत्त्वही देखील अधोरेखित होईल, असा विश्वास वाटतो.
— विजयकुमार खोराटे, अतिरिक्त आयुक्त, पिंपरी चिंचवड महापालिका
