पिंपरी, दि.02 (पीसीबी) : पालकमंत्रिपदाचा पेच कायम असताना आता स्थानिक स्वराज्य संस्थांच्या निवडणुकांवरुन रस्सीखेच सुरु झालेली आहे. सत्ताधारी महायुती स्थानिक स्वराज्य संस्थांमध्ये एकत्र नसेल, सत्तेत सोबत असलेले पक्ष स्थानिक पातळीवर मात्र एकमेकांच्या विरोधात असतील, याची शक्यता दिसू लागली आहे. उपमुख्यमंत्री आणि राष्ट्रवादी काँग्रेसचे राष्ट्रीय अध्यक्ष अजित पवार यांना त्यांच्याच बालेकिल्ल्यात पुन्हा एकदा धक्का देण्याची तयारी भाजपनं सुरु केली आहे. स्वबळावर लढणार असल्याचे भाजप नेत्यांनी सांगितल्याने अजितदादांच्या राष्ट्रवादी काँग्रेसची मोठ गोची झाली आहे.
पिंपरी चिंचवड महापालिका निवडणूक स्वबळावर लढवण्याची तयारी भाजपकडून सुरु करण्यात आली आहे. मुख्यमंत्री देवेंद्र फडणवीस यांच्या आदेशानंतर आम्ही सगळ्या जागा लढवण्याची तयारी सुरु केली आहे, अशी माहिती चिंचवडचे आमदार शंकर जगताप यांनी केली आहे. ‘लोकसभा, विधानसभेला महायुती होती. स्थानिक स्वराज्य संस्थांमध्ये महायुती नाही. स्थानिक पातळीवर आम्ही स्वबळावर लढणार आहोत. मुख्यमंत्री देवेंद्र फडणवीस यांनी तसं स्पष्टच सांगितलेलं आहे,’ असं जगताप यांनी सांगितलं.
पुणे जिल्ह्यावरील वरचष्मा कायम राखण्यासाठी भाजप आणि राष्ट्रवादी काँग्रेसमध्ये संघर्ष पाहायला मिळाला आहे. २०१४च्या आधी अजित पवार सत्तेत असताना त्यांनी पुणे, पिंपरी चिंचवड महापालिकेवर सत्ता आणली. ती त्यांनी बराच काळ कायम राखली. पिंपरी-चिंचवडचं वाढतं शहरीकरण ओळखून अजित पवारांनी तिकडे जातीनं लक्ष घातलं. त्यामुळे पिंपरी-चिंचवड महापालिका अस्तित्त्वात आल्यापासून राष्ट्रवादीनं वर्चस्व राखलं.
२०१२ मध्ये राज्यात आघाडीचं सरकार असताना राष्ट्रवादी काँग्रेसनं पिंपरी चिंचवडमध्ये ८३ जागा जिंकत एकहाती सत्ता आणली. महापालिकेत एकूण १२८ प्रभाग आहेत. २०१२ मध्ये पालिकेत भाजपचे केवळ ३ नगरसेवक होते. २०१७ मध्ये झालेल्या निवडणुकीत भाजपचे तब्बल ७७ उमेदवार निवडून आले. तर राष्ट्रवादीच्या नगरसेवकांची संख्या ८३ वरुन ३६ वर घसरली. भाजपनं एकहाती विजय मिळवत अजित पवारांच्या वर्चस्वाला धक्का दिला.
२०१७ मध्ये मिळवलेलं वर्चस्व कायम राखण्यासाठी आता भाजपनं पिंपरी-चिंचवड महापालिका निवडणूक स्वबळावर लढवण्याची तयारी सुरु केली आहे. पिंपरी-चिंचवड महापालिका निवडणूक अजित पवारांसाठी अस्तित्त्वाची, तर भाजपसाठी वर्चस्वाची लढाई आहे. राष्ट्रवादी काँग्रेसचे अजित पवार यांच्यासोबतच भाजपचे चंद्रकांत पाटीलही पुण्यातून निवडून येतात. त्यांच्यामध्ये पालकमंत्रिपदावरुन रस्सीखेच आहे. आता सरकारमध्ये असलेले हेच दोन दादा महापालिका निवडणुकीत आमनेसामने असतील.
