अमरावती, दि. १६ (पीसीबी)
मी जे मुद्दे भाषणात बोलतो, तेच मुद्दे पंतप्रधान मोदी त्यांच्या भाषणात बोलतात. त्याच त्या गोष्टी परत परत सांगतात. कदाचित त्यांना स्मृतीभ्रंश झाला आहे. त्यांचं वागणं बघून अमेरिकेच्या माजी अध्यक्षांची आठवण येते. तेही अनेकदा गोष्टी विसरायचे. पंतप्रधान मोदीसुद्धा आता त्याच मार्गावर आहेत, अशी घणाघाती टीका लोकसभेचे विरोधी पक्षनेते राहुल गांधी यांनी केली आहे. तसेच धारावीची जागा अदाणींना देण्याचा बदल्यात आमदार विकत घेण्याचा सौदा झाला आणि त्यातून महाराष्ट्रातील महाविकास आघाडीचं सरकार पाडण्यात आलं, आरोपही त्यांनी केला. अमरावतीत आज राहुल गांधी यांची प्रचारसभा आयोजित करण्यात आली होती. यावेळी त्यांनी पंतप्रधान मोदींसह भाजपाला लक्ष्य केलं.
काय म्हणाले राहुल गांधी?
“आम्ही बोलतो तेच गोष्टी पंतप्रधान मोदी बोलतात. त्याच त्या गोष्टी परत परत सांगतात. त्यांना आता स्मृतीभ्रंश झाला आहे. त्यांचं वागणं बघून अमेरिकेच्या माजी अध्यक्षांची आठवण येते. तेही अनेकदा गोष्टी विसरायचे, त्यांच्या बाजुला असलेल्या व्यक्तीला त्यांना आठवण करून द्यावी लागत होती. एकदा युक्रेनचे राष्ट्राध्यक्ष अमेरिकेच्या राष्ट्रध्यक्षांना भेटण्यासाठी आले होते. त्यावेळी अमेरिकेच्या माजी अध्यक्षांनी त्यांना रशियाचे अध्यक्ष म्हणून संबोधले. नंतर अधिकाऱ्यांनी ते युक्रेनचे राष्ट्राध्यक्ष असल्याचे त्यांना सांगितलं. आता पंतप्रधान मोदीही याच मार्गाने जात आहेत”, अशी टीका राहुल गांधी यांनी केली.
