मुंबई, दि. 26 (पीसीबी) : विधानसभा अध्यक्ष आणि कुलाबा मतदारसंघाचे प्रतिनिधित्व करणारे राहुल नार्वेकर यांच्या संपत्तीत काहीशी घट झाली असून दुसरीकडे त्यांच्या पत्नीच्या संपत्तीत मात्र मोठी वाढ झाल्याचे दिसून आले आहे. दुसरीकडे भाजपचे उमेदवार आशीष शेलार यांच्या संपत्तीत पाच वर्षांत दुपटीने वाढ झाल्याचे दिसून आले.
प्रतिज्ञापत्रात शुक्रवारी राहुल नार्वेकर यांनी आपल्याकडे ७.१७ कोटी रुपयांची, तर पत्नी सरोजीनी यांच्याकडे ८.५३ कोटी रुपयांची संपत्ती असल्याचे जाहीर केले. त्यांच्याकडे असलेल्या स्थावर मालमत्तेचे मूल्य २७.१० कोटी रुपये आणि वारसाहक्काने मिळालेल्या मालमत्तेचे मूल्य १.०६ कोटी रुपये आहे, तर पत्नीकडील मालमत्तेचे मूल्य ८३ कोटी रु. असून वारसाहक्काने मिळालेल्या मालमत्तेचे मूल्य २.८५ कोटी आहे. नार्वेकर यांच्याकडे रोख रक्कम १.८८ लाख तर पत्नीकडे ३० हजार रुपये आहेत. नार्वेकर यांच्याकडे मर्सिडीज (पाच लाख रु.), इनोवा क्रिस्टा (७.३७ लाख रु.), महिंद्रा एक्सयूव्ही (४.३० लाख रु.) आणि फॉर्च्युनर (३१.२१ लाख रु.) अशा चार गाड्या आहेत. नार्वेकर यांच्यावर १७.८४ कोटी, तर पत्नीवर ६६.८४ कोटींचे कर्ज आहे. २०१९ साली नार्वेकर यांनी १०.५३ कोटींची, तर पत्नीकडे ३९लाख रुपयांची संपत्ती जाहीर केली होती. स्वतःकडे २३ लाख रुपयांची स्थावर मालमत्ता आणि वारसा हक्काने मिळालेली एक कोटी रुपयांची मालमत्ता आणि पत्नीकडे २.८५ कोटी रुपयांची मालमत्ता असल्याचे त्यांनी म्हटले होते. नार्वेकर यांच्यावर २० कोटी रुपयांचे कर्ज होते.
वांद्रे पश्चिम येथून उमेदवारी अर्ज दाखल केलेले आशीष शेलार यांची संपत्ती पाच वर्षांत दुप्पट झाल्याचे दिसून आले. शेलार यांच्याकडे ८.३४ कोटी, तर पत्नी प्रतिमा यांच्याकडे १०.४३ कोटींची संपत्ती आहे. त्यांच्याकडील स्थावर मालमत्तेची किंमत ८.७१ कोटी, तर पत्नीच्या नावावरील मालमत्तेचे मूल्य १२.९६ कोटी आहे. शेलार यांच्यावर ८८.१८ लाखांचे, तर त्यांच्या पत्नीवर ९८.७४ लाखांचे कर्ज आहे. शेलार यांच्याकडे १,९०० रु., तर पत्नीकडे ८७,६९० रुपये रोख रक्कम आहे. शेलार यांनी २०१९मध्ये जाहीर केलेल्या प्रतिज्ञापत्रानुसार, त्यांच्याकडे ४.११ कोटी, तर त्यांच्या पत्नीकडे ३.७९ कोटींची संपत्ती होती. कुटुंबाकडे एकूण ३.४३ कोटींची संपत्ती होती. त्यावेळी शेलार यांच्या स्थावर मालमत्तेचे मूल्य ३.०२ कोटी, तर पत्नीकडील मालमत्तेचे मूल्य ३.६४ कोटी होते. शेलार यांच्यावर ७१.८२ लाख, तर पत्नीवर ९१.९२ लाखांचे कर्ज होते.
