पिंपरी, दि. ११ – शहरातील पर्यावरण प्रेमींची बाजू समजून घ्या आणि नंतरच नदी सुधार प्रकल्पाचे कामाचा विचार करा, पंधरा दिवस त्याला स्थगिती द्या अशी कडक शब्दांत दस्तुरखुद्द शरद पवार यांनी महापालिका प्रशासक आयुक्त शेखर सिंह यांना आज सुनावले. मनसेचे राज ठाकरे, उपमुख्यमंत्री अजित पवार यांच्या पाठोपाठ आता राष्ट्रवादी काँग्रेस शरदचंद्र पवार पक्षाचे सर्वेसर्वा यांनी प्रशासनाची हजेरी घेतली आहे.
पवना, इंद्रायणी आणि मुळा या नद्यांच्या सुधारणेसाठी तब्बल ३४०० कोटींचा प्रकल्प महापालिकेने हाती घेतला आहे. मुळा नदी बाबत कोणालाही विचारात न घेता परस्पर निविदा काढून घाईघाईत काम सुरू केले. शहरातील संस्था, संघटनांनी एकत्र येत या विषयावर आंदोलने सुरू केल्यावर प्रशासन हादरले. नागरिकांना विचारात घेतले हे दाखविण्यासाठी सांगवी येथील नदी सुधार कार्यालयात गवगवा न करता एक बैठक बोलावली. पर्यावरणवाद्यांना खबर लागताच सर्वजणांनी मिळून तो फार्स हाणून पाडला. तब्बल ४० संघटनांचे कार्यकर्ते एक झाले आणि सनदशीर मार्गाने मानवी साखळी, जनजागृती आंदोलन दर रविवरी सुरू केले. शहरातून त्याला मोठा प्रतिसाद मिळाल्याने भ्रष्टाचारी प्रशासनातील अधिकाऱ्यांत घबराट पसरली.
जेष्ठ पर्यावरण प्रेमी धनंजय शेडबाळे यांच्या नेतृत्वाखालील शिष्टमंडळाने याच विषयावर मोदी बागेत शरद पवार यांची भेट घेतली. त्यावेळी तुषार शिंदे, बाबा भोईर, सागर चिंचवडे, संतोष माचुत्रे, शुभम पांडे, डॉमनिक लोबो, विजय पोटकुले आणि राष्ट्रवादी शहराध्यक्ष तुषार कामठे यावेळी उपस्थित होते.
तब्बल पाऊन तास शरद पवार यांनी सर्वांचे मत ऐकूण घेतले आणि थेट आयुक्त शेखर सिंह यांना फोन लावला. पर्यावरण मित्रांचे मत का ऐकले जात नाही, परस्पर प्रकल्प कसे लादता, लोकांना विचारात घ्या आदी प्रश्नांची सरबत्ती त्यांनी केली. शेखर सिंह हे अक्षरशः मनमानी करतात आणि प्रकल्पाची मागणी नसताना तो लादत असल्याचे गाऱ्हाणे सर्वांनी केले. पवार यांनी खडासावून विचारल्यावर अगोदर
पुढच्या आठवड्यत आणि नंतर उद्या सकाळी ११ वाजता वेळ द्यायचे त्यांनी मान्य केले.
