लखनऊ, दि. ८ –
उत्तर प्रदेशमधील कुशीनगर जिल्ह्यात एक मन सुन्न करणारी घटना उघडकीस आली आहे. कुशीनगरमध्ये एका व्यक्तीने आपल्या पत्नीचं हॉस्पिटलचं चार हजारांचं बिल भरण्यासाठी आपल्याच मुलाला २० हजार रुपयांना विकल्याची धक्कादायक घटना समोर आली आहे. खासगी रुग्णालयात दाखल करण्यात आलेल्या गर्भवती पत्नीला आणि नवजात मुलाचं हॉस्पिटलचं बिल भरण्यासाठी पैसे नसल्यामुळे हॉस्पिटलमधून डिस्चार्ज मिळत नव्हता. त्यामुळे वडिलांनी आपल्या दुसऱ्या तीन वर्षांच्या एका मुलाला २० हजार रुपयांना विकलं. या घटनेनंतर उत्तर प्रदेशमध्ये एकच खळबळ उडाली आहे. यासंदर्भातील वृत्त इंडिया टुडेनी दिलं आहे.
नेमकी घटना काय घडली?
उत्तर प्रदेशच्या कुशीनगर जिल्ह्यातील एका व्यक्तीने आपल्या गर्भवती पत्नीला खासगी हॉस्पिटलमध्ये दाखल केलं होतं. मात्र, त्यानंतर पत्नीला आणि नवजात बाळाला खासगी हॉस्पिटलमधून घरी घेऊन जाण्यासाठी हॉस्पिटलचं बिल भरण्यासाठी त्यांच्याकडे चार हजार रुपये नव्हते. मात्र, हॉस्पिटलचं बिल भरल्याशिवाय पत्नीला आणि नवजात बाळाला डिस्चार्ज देण्यास हॉस्पिटलने नकार दिला. त्यामुळे त्या हाताश झालेल्या व्यक्तीने आपल्या २ वर्षाच्या दुसऱ्या निरागस मुलाला विकण्याचा निर्णय घेतला.
यानंतर त्या व्यक्तीने आपल्या २ वर्षाच्या मुलाला २० हजार रुपयांमध्ये विकले. मात्र, यावेळी कोणालाही संशय येऊ नये म्हणून मुलगा विकत घेणाऱ्यांनी मुलगा दत्तक दिला आहे, असं वाटावं म्हणून एका पत्रकावर सही घेतल्याची माहिती सांगितली जात आहे. यानंतर त्या पतीने आपल्या पत्नीचे आणि नवजात बाळाचं हॉस्पिटलचं ४ हजार रुपयांचं बिल भरलं आणि पत्नीला व बाळाला हॉस्पिटलमधून घरी नेलं. या घटनेची माहिती मिळताच आईला रडू कोसळलं.
दरम्यान, यानंतर या घटनेची गावात चर्चा झाली आणि यानंतर हे प्रकरण पोलिसांपर्यंत पोहोचलं. हे जोडप मोलमजुरीचं काम करत असल्याचं स्थानिक गावकरी सांगतात. त्यांना ६ अपत्य असल्याचंही सांगितलं जात आहे. त्यांचं पालनपोषण ते मोलमजुरी करून करतात. दरम्यान, या घटनेबाबत सोशल मीडियावरही काही पोस्ट व्हायरल झाल्या आणि संतापाची लाट उसळली. त्यानंतर पोलिसांनी तपास केला असता ही धक्कादायक घटना समोर आली.
यानंतर पोलिसांनी तातडीने कारवाई केली. या प्रकरणात पोलिसांनी शनिवारी मुलाला घेऊन जाणाऱ्या जोडप्यासह पाच जणांना अटक केली. तसेच हॉस्पिटलचं बिल भरण्यासाठी मुलाला विकण्यास भाग पाडल्याप्रकरणी पोलिसांनी हॉस्पिटलमधील दोघांना अटक केली असून मुलाची विक्री करणारा मध्यस्थ आणि मुलाला विकत घेणाऱ्या व्यक्तीला अटक करण्यात आल्याची माहिती सांगितली जात आहे. या प्रकरणाचा पुढील तपास पोलीस करत आहेत.
