बुलढाणा, दि. ११ : जिल्ह्यातील शेगाव तालुक्यातील ११ गावांमध्ये दूषित पाण्यामुळे टक्कल पडण्याची समस्या उद्भवलेली असताना आता संपूर्ण जिल्ह्यासमोर नवं संकट उभं ठाकलं आहे. ११ गावांमध्ये केसगळतीची समस्या निर्माण झाली आहे. आधी डोक्याला खाज, मग हातात येणारे केसांचे पुंजके, त्यानंतर तीन दिवसांत टक्कल पडत असल्यानं ग्रामस्थ भयभीत झाले आहेत. केसगळती, टक्कल पडण्यामुळे गावकरी चिंतेत असताना आता अख्ख्या जिल्ह्यावरच मोठं संकट निर्माण झालं आहे.
शेगावमधील ११ गावांमध्ये केस गळतीची समस्या निर्माण झाली आहे. केस गळण्याच्या भीतीनं काहींनी चार-पाच दिवसांपासून, तर काहींनी आठ दिवसांपासून अंघोळच केलेली नाही. ग्रामस्थांमध्ये पाण्याची दहशत पसरली आहे. त्यामुळे अनेकांनी आठवडाभर अंगाला पाणी लावलेलं नाही. टक्कल पडण्याचा संबंध दूषित पाण्याशी असल्याचा संबंध असल्याची शंका आल्यानं पाण्याचे नमुने तपासणीसाठी खामगावातील लॅबमध्ये पाठवण्यात आले.
पाण्यातील आर्सेनिक, लीड, नायट्रेटच्या प्रमाणाची तपासणी करण्यात आली. पिण्याच्या पाण्यात नायट्रेटचं प्रमाण १० च्या आत असायला हवं. पण टक्कल पडण्याची समस्या उद्भवलेल्या भागात हे प्रमाण तब्बल ५४ मिलिग्रॅम पर लीटर म्हणजेच पाचपट आहे. याशिवाय टीडीएसदेखील २१०० आहे. केमिकल दूषित पाणी असल्यानं तिथे आरोग्याच्या समस्या निर्माण होत असल्याचं तपासणीतून समोर आलं आहे.
संपूर्ण जिल्ह्यात दूषित पाण्याची समस्या उद्भवत असल्यानं बुलढाण्यावर ब्ल्यू बेबी सिंड्रोमचं सावट निर्माण झालं आहे. या सिंड्रोममुळे चिमुकल्या बाळांचं आरोग्य धोक्यात येतं. त्यांची त्वचा निळी पडते. त्यामुळेच या आजाराला ब्ल्यू बेबी सिंड्रोम म्हटलं जातं. या सिंड्रोममुळे अवयवांची कार्यक्षमता कमी होते. बाळांचं वजन वाढत नाही. त्यांचा नीट विकास होत नाही. हृदयाचे ठोके, श्वासाचा वेग वाढतो. बाळांना दूध पिताना समस्या येतात. लहान मुलं लगेच थकतात. ते चिडचिडी होतात.
