– नोकरीच्या शोधात आलेल्या इसमाची चिट्ठी लिहून आत्महत्या
पिंपरी, दि. १० (पीसीबी) – “माझा मृतदेह खड्ड्यात फेका, कारण मृत्युनंतर दुःख व्यक्त करायला मला जवळच असं कोणीच नाही, असा मजकूर लिहून एकाने केजुदेवी बंधाऱ्यात आत्महत्या केली. हा धक्कादायक प्रकार शुक्रवारी (दि. १०) सकाळी थेरगाव येथे उघडकीस आला. अत्यंत चटका लावणाऱ्या बातमीने नागरिकांनी हळहळ व्यक्त केली.
सुरेश कुमार (रा. केरळ) असे आत्महत्या केलेल्याचे नाव आहे. पोलीसांनी दिलेल्या माहितीनुसार, शुक्रवारी सकाळी थेरगाव येथील केजुदेवी बंधाऱ्यात मृतदेह तरंगत असल्याची माहीती पोलिसांना मिळाली. त्यानुसार, त्यांनी घटनास्थळी धाव घेत मृतदेह पाण्याबरोबर काढला. पोलिसांनी घटनास्थळी एक चिट्ठी मिळून आली आहे. यामध्ये ”मी शहरात नोकरीच्या शोधात आलो होतो. मात्र, मला काम मिळाले नाही. माझ्या खिशात पैसे आणि खाण्यासाठी अन्न नाही. त्यामुळे मी आत्महत्या करीत आहे. माझा मृतदेह खड्ड्यात फेका, कारण मृत्युनंतर दुःख व्यक्त करायला मला जवळच असं कोणीच नाही”, असे नमूद करण्यात आले आहे.
पोलिसांनी चिट्ठी जप्त केली आहे. मात्र, ही चिट्ठी सुरेश यानेच लिहिली आहे का, तसेच, यामागे काही घातपात आहे का याबाबत वाकड पोलिस तपास करीत आहेत.
