मुंबई, दि. २६ (पीसीबी) मोदी मंत्रीमंडळातील सर्वोत्तम कामगिरी असलेले आणि देशाचे भावी पंतप्रधान म्हणून ज्यांचा उल्लेख केला जातो ते नितीन गडकरी यांंच्या जीवनावर आधारीत गडकरी चित्रपट शुक्रवारी (दि.२७) सर्व चित्रपटगृहांतून प्रेक्षकांच्या भेटीला येत आहे. लोकसभा, विधानसभा आणि नंतर महापालिका व जिल्हापरिषद निवडणुका आगामी वर्षभरात होणार असल्याने अचूक टायमिंग साधून त्यातूनच राजकीय प्रतिमा उंचावण्याचा प्रयत्न असल्याने हा चित्रपट अत्यंत महत्वाचा समजला जातो आहे.
गडकरी मराठी सिनेमाची सर्वांना उत्सुकता होती. सिनेमात नितीन गडकरींची भूमिका कोण साकारणार हे मात्र अनेक दिवसांपासून गुलदस्त्यात होतं. अशातच गडकरी सिनेमाबद्दल मोठी अपडेट समोर आलीय. सिनेमात केंद्रीय मंत्री नितीन गडकरींची भूमिका कोण साकारणार याचा खुलासा झालाय. कोण आहे हा कलाकार? जाणून घ्या सविस्तर.
यापूर्वी गडकरी या चित्रपटाचे पोस्टर, टिझर झळकल्यानंतर प्रेक्षकांना उत्सुकता होती ती, नितीन गडकरी यांची भूमिका कोण साकारणार याची. आता या चित्रपटाचे दुसरे पोस्टर झळकले असून यातील ‘गडकरी’ यांचा चेहरा समोर आला आहे.
नितीन गडकरी यांची भूमिका राहुल चोपडा साकारणार आहेत. तर त्यांच्या पत्नीची म्हणजेच कांचन गडकरी यांची भूमिका ऐश्वर्या डोरले साकारणार आहे.
या व्यतिरिक्त गडकरी या चित्रपटात नितीन गडकरी यांच्या मित्रांच्या भूमिकेत अभिलाष भुसारी, पुष्पक भट, अभय नवाथे, वेदांत देशमुख दिसतील तर पत्रकाराची भूमिका तृप्ती प्रमिला केळकर हिने साकारली आहे. अशाप्रकारे गडकरी सिनेमात तगड्या कलाकारांची स्टारकास्ट दिसतेय. अनुराग राजन भुसारी दिग्दर्शित ‘गडकरी’ हा चित्रपट येत्या २७ ऑक्टोबर रोजी चित्रपटगृहात प्रदर्शित होणार आहे. ‘गडकरी’ची कथा, पटकथाही अनुराग राजन भुसारी यांची असून अनुराग भुसारी, मिहिर फाटे या चित्रपटाचे सहनिर्माते आहेत. राहूल चोपडा नितीन गडकरींच्या भूमिकेला नक्कीच न्याय देईल याची सर्व प्रेक्षकांना अपेक्षा आहे.
