दि.१३(पीसीबी)-ठाकरे गटाचे खासदार संजय राऊत यांची प्रकृती अचानक बिघडली असून त्यांना रुग्णालात दाखल करण्यात आले आहे. मिळालेल्या माहितीनुसार, भांडुप मधील फोर्टिस रुग्णालयात राऊत यांच्यावर उपचार सुरु आहेत. काही दिवसापूर्वी संजय राऊत यांनी फोर्टीज हॉस्पिटल मध्ये आपली रक्त तपासणी केली होती. त्यांना घशाचा त्रास होत असल्याची माहिती समोर आली आहे.
काही तासांपूर्वीच, राऊत यांनी पत्रकार परिषद घेत राज ठाकरे यांच्याबद्दल मोठे विधान केले होते. काँग्रेसला सोबत घेण्याची राज ठाकरेंची इच्छा असल्याचे राऊत यांनी म्हटले आहे.
स्वतः राज ठाकरे यांची इच्छा आहे की, आपल्याला महाविकास आघाडीतील घटक पक्ष असलेल्या काँग्रेसला सुद्धा सोबत घेणे गरजेचे आहे. ही त्यांची एक भूमिका आहे. मात्र, याचा अर्थ तो निर्णय नाही.
या राज्यात प्रत्येकाचे एक स्थान आहे. जसे शिवसेनेचे, महाराष्ट्र नवनिर्माण सेनेचे, शरद पवार साहेबांचे, डाव्या पक्षांचे तसेच काँग्रेस सुद्धा महाराष्ट्रातला एक महत्त्वाचा पक्ष आहे. शिष्टमंडळात काँग्रेसचा समावेश होणे गरजेचं आहे. ही सर्वांचीच भूमिका असून राज ठाकरेंची सुद्धा तीच भूमिका असल्याचे राऊत यांनी म्हटले आहे.
