मावळ, दि. ७ (पीसीबी) – मावळ मुळशी तालुका उप विभागीय अधिकारी कार्यालयात एका शेतकऱ्याला दगडाने आणि लाथाबुक्क्यांनी बेदम मारहाण करण्यात आली. ही घटना मंगळवारी (दि. 5) दुपारी साडेबारा वाजता घडली.
मधुकर रतिकांत जगताप (वय 45, रा. देहूरोड) यांनी याप्रकरणी हिंजवडी पोलीस ठाण्यात फिर्याद दिली आहे. त्यानुसरा तुषार नथू जगताप (वय 35), किसन दगडू जगताप (वय 90, दोघे रा. सांगवडे, ता. मावळ), दोन अनोळखी व्यक्तींच्या विरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी हे कौटुंबिक जमिनीच्या वादाची तारीख असल्याने मंगळवारी बावधन येथील मावळ मुळशी तालुका उप विभागीय अधिकारी कार्यालयात गेले होते. तिथे आरोपींनी त्यांना दगडाने आणि लाठ्बुक्क्यानी मारहाण केली. त्यात ते गंभीर जखमी झाले आहेत. जमिनीच्या वादातून हा हल्ला झाल्याचे म्हटले जात आहे. हिंजवडी पोलीस तपास करीत आहेत.
