मुंबई, दि. १८ (पीसीबी) : वांद्रे पूर्व येथील भारत नगर परिसरात आज सकाळी एक मोठी दुर्घटना घडली. मुंबईतील बांन्द्रा पूर्व येथील भारत नगर परिसरात शुक्रवारी सकाळी एक तीन मजली मोठी इमारत कोसळली. ढिगाऱ्याखाली किमान १० जण अडकल्याची भीती व्यक्त केली जात आहे. अद्याप कोणतीही जीवितहानी झाल्याची माहिती समोर आलेली नाही.
या दुर्घटनेत सात जणांना वाचवण्यात आलं असून त्यांना भाभा रुग्णालयात दाखल करण्यात आलं आहे. त्यांची प्रकृती स्थिर आहे की नाही, याबाबत अधिकृत माहिती अद्याप समोर आलेली नाही. सकाळी ५ वाजून ५५ मिनिटांच्या सुमारास ही घटना घडली. अग्निशमन दल, मुंबई पोलीस आणि महानगरपालिकेचे कर्मचारी घटनास्थळी बचावकार्य करत आहेत.
भरत नगरमधील चाळ क्रमांक ३७ ही तीन मजली इमारत अचानक कोसळली. या दुर्घटनेमुळे परिसरात एकच खळबळ उडाली. सकाळच्या शांततेत अचानक मोठा आवाज झाला आणि लोकांचा एकच आक्रोश सुरू झाला. सध्या घटनास्थळी बचावकार्य सुरू आहे. आठ अग्निशमन गाड्या घटनास्थळी दाखल झाल्या. ढिगारा हटवण्याचं काम युद्धपातळीवर सुरू आहे. इमारतीच्या ढिगाऱ्याखाली अडकलेल्या लोकांना बाहेर काढण्यासाठी शर्थीचे प्रयत्न केले जात आहेत.
चाळ कशी कोसळली याबाबत अद्याप कोणतीही माहिती मिळाली नाही. बचावकार्य संपल्यानंतर या घटनेची चौकशी केली जाईल, अशी माहिती पालिका प्रशासनाने दिली आहे. घडलेल्या घटनेनंतर परिसरात भीतीचं वातावरण पसरलं आहे. अनेक लोक घटनास्थळी जमा झाले असून प्रशासनाला मदत करत आहेत.
सध्या परिसरात तणावाचं वातावरण आहे, परंतु प्रशासन परिस्थिती नियंत्रणात ठेवण्याचा प्रयत्न करत आहे. लोकांनी अफवांवर विश्वास ठेवू नये, असं आवाहन प्रशासनाने केलं आहे. तसंच, अधिक माहितीसाठी प्रशासनाशी संपर्क साधावा, असंही सांगण्यात आलं आहे. घडलेल्या दुर्घटनेमुळे परिसरात शोककळा पसरली आहे.
