पुणे : स्वारगेट बस स्थानकात एका शिवशाही बसमध्ये 26 वर्षीय तरुणीवर अत्याचार झाल्याची घटना ताजी असतानाच आता पुण्यातील आयटी अभियंता तरुणीवर सामूहिक अत्याचार केल्याची धक्कादायक घटना उघडकीस आली आहे. त्यामुळे पुणे शहर हादरलं असून पुन्हा एकदा महिलांच्या सुरक्षेचा प्रश्न ऐरणीवर आला आहे.
याबाबत अधिक माहिती अशी की, पुण्यात आयटी क्षेत्रात नोकरी करणाऱ्या इंजिनियर तरुणीला शीतपेयातून गुंगीच्या गोळ्या देऊन चौघां नराधमांनी मुंबईत कांदिवली येथे तिच्यावर सामूहिक अत्याचार केल्याची धक्कादायक घटना उघडकीस आली आहे. सोशल मीडियावर फोटो व्हायरल करण्याची धमकी देत नराधम आरोपींनी पीडित तरुणीकडून दहा लाख रुपये आणि दोन आयफोन उकळले असल्याची माहिती समोर आली आहे. याप्रकरणी पीडीतेच्या मित्रांसह चौघा जणावर गुन्हा दाखल करण्यात आला आहे.याप्रकरणी, ३३ वर्षीय तरुणीने काळेपडळ पोलिस ठाण्यात फिर्याद दिली होती.त्यानुसार पोलिसांनी तमीम हरसल्ला खान (रा. कांदिवली) आणि त्याचे अन्य तीन मित्र अशा चौघांच्या विरुद्ध बलात्कार, अनैसर्गिक कृत्य, फसवणूक, अपहार, धमकावून मारहाण, अशा भादंविमधील विविध कलमांन्वये गुन्हा दाखल करण्यात आला आहे.
याबाबत पोलिसांनी दिलेल्या माहितीनुसार, फिर्यादी तरुणी मूळची कर्नाटकातील असून फेसबुकच्या माध्यमातून 2021 मध्ये आरोपी खान यांच्यासोबत तिची ओळख झाली होती. आपल्या वडिलांचा मोठा बांधकाम व्यवसाय असून तो मी पाहत असल्याची बतावणी त्यांन केली होती. लग्नाच्या आमिषाने खानने त्या तरुणीला आपल्या जाळ्यात ओढल्याने ती भेटण्यासाठी कांदिवलीत गेली होती. फॅब हॉटेलमध्ये दोघे भेटले असता खानने गुंगीच्या गोळ्या टाकून पीडित तरुणीला द्रव्य पाजले. तिच्यावर अत्याचार केल्यानंतर कारमध्ये नेऊन मुंबईसह पुण्यातही आपल्या मित्रांच्यासह तिच्यावर अत्याचार केल्याची माहिती समोर आली आहे. या घटनेने पुन्हा पुणे शहर हादरलं असून प्रशासन आता तरी जागे होणार का? असा सवाल उपस्थित केला जात आहे. या घटनेने महिलांची सुरक्षा पुन्हा एकदा चव्हाट्यावर आल्याच दिसून येत आहे.
