मुंबई, दि. ७ – महायुती सरकारमधील मंत्रीपदांवर कोणत्या आमदाराची निवड होईल, याकडे सर्वांचे लक्ष लागले आहे. विशेषतः पुण्याचा पालकमंत्री कोण होणार, यासाठी भाजप आणि राष्ट्रवादी काँग्रेसमध्ये रस्सीखेच सुरू आहे. भाजप कार्यकर्त्यांच्या मागणीनुसार, चंद्रकांत पाटील पुण्याचे पालकमंत्री व्हावेत, अशी मागणी जोर धरत आहे. मात्र, अजित पवार आपला बालेकिल्ला सोडतील, असे वाटत नाही.
२०१९ ते २०२४ या कालावधीत अनेक सरकार स्थापनेच्या नाट्यप्रसंगांना जनता साक्षी राहिली आहे. पहाटेच्या शपथविधीपासून ते चाळीस आमदारांच्या गुवाहाटी दौऱ्यापर्यंत आणि त्यानंतर झालेल्या मुळ शिवसेना आणि राष्ट्रवादीच्या विभाजनानंतर झालेली घराणेशाहीच्या नेत्यांची परवड, सारेच जनतेने उघड्या डोळ्यांनी पाहीले आहे. शिवसेना-भाजप युतीचे सरकार स्थापन झाल्यानंतर चंद्रकांत पाटील यांची पुण्याचे पालकमंत्री म्हणून निवड झाली होती. त्या वेळी भाजपचे सत्ताकाल चांगल्या स्थितीत होते. मात्र, काही काळानंतर अजित पवार सत्तेत आल्यानंतर चंद्रकांत पाटील यांच्याकडून पालकमंत्रीपदाचा कार्यभार काढून घेण्यात आला आणि पुन्हा एकदा अजित पवारांकडे हा कार्यभार देण्यात आला.
पुणे हा अजित पवारांचा बालेकिल्ला असल्याने, पुण्यात प्रशासकीय आणि राजकीय वर्चस्व पुन्हा त्यांनी काबीज केले. त्यांच्याकडून आपल्या जवळच्या सहकाऱ्यांना कामे व टेंडर देण्यात आली असल्याचा आरोप भाजप कार्यकर्त्यांनी केला होता. याबाबत अनेकदा भाजप आणि राष्ट्रवादीच्या नेत्यांमध्ये खटके उडाले. त्यामुळे मंत्रीपदाचा विस्तार होण्यापूर्वीच भाजप कार्यकर्ते सतर्क झाले आहेत आणि पुण्याचा पालकमंत्री म्हणून चंद्रकांत पाटील यांची नियुक्ती व्हावी, अशी मागणी करत आहेत.
परंतु अजित पवार पुण्याच्या पालकमंत्रीपदाचा दावा सोडतील का, हा प्रश्न अजूनही अनुत्तरित आहे आणि महायुतीपुढे मोठे आव्हान उभे आहे. त्यामुळे आता पुण्याचा पालकमंत्री कोण होणार हे पाहणं पुन्हा एकदा ‘इंटरेस्टींग’ होणार आहे.
