मुंबई, दि. ३० – न्यायालयीन प्रकऱणांमुळे अडकलेल्या नगरपरिषदा आणि नगरपालिकांचा सुधारीत कार्यक्रम निवडणूक आयोगाने जाहीर केला आहे. दरम्यान, ५० टक्के आरक्षण मर्यादेचे उल्लंघन करणाऱ्या २ डिसेंबरला निवडणूक होणाऱ्या ५७ नगपंचायतींवर सर्वोच्च न्यायालयाची टांगती तलवार कायम असल्याने संभ्रम कायम आहे. २१ जानेवारीला निकाल विरोधात गेला तर या पालिकांच्या निवडणुका रद्दबातल ठरणार आहेत.
मंगळवेढा नगरपरिषद तसेच नगराध्यक्षपद आणि नगरसेवक पदांच्या निवडणुकीची प्रक्रिया अखेर नव्या तारखांसह जाहीर करण्यात आली आहे. नगराध्यक्षपदाच्या उमेदवारांशी संबंधित न्यायालयीन प्रकरणांमुळे अडकलेली निवडणूक आता 20 डिसेंबर रोजी होणार असून, राज्य निवडणूक आयोगाने सुधारित कार्यक्रम जाहीर केला आहे.
मंगळवेढा नगराध्यक्षपदाच्या उमेदवारी अर्जांवर एकूण तीन अपील जिल्हा न्यायालयात दाखल झाली होती. या अपिलांवर 27 नोव्हेंबरपर्यंत निर्णय न झाल्याने निवडणूक आयोगाने संपूर्ण निवडणूक प्रक्रिया स्थगित केली होती. जिल्हाधिकाऱ्यांनीही याबाबतची माहिती राज्य निवडणूक आयोगाकडे पाठवली होती. पूर्वीच्या कार्यक्रमानुसार मतदान 2 डिसेंबरला आणि मतमोजणी 3 डिसेंबरला होणार होती. मात्र न्यायालयीन अडथळ्यांमुळे संपूर्ण कार्यक्रम रद्द करावा लागला.
निर्णयाची प्रतीक्षा आणि संभ्रम निर्माण झाल्यानंतर आता राज्य निवडणूक आयोगाने मंगळवेढा नगराध्यक्ष आणि नगरसेवक पदांच्या निवडणुकीसंदर्भात नवा सुधारित कार्यक्रम जाहीर केला आहे. राज्य निवडणूक आयोगाचे सचिव सुरेश काकाणी यांनी हा निर्णय जाहीर केला. सहआयुक्त योगेश डोके यांनीही या कार्यक्रमानुसार पुढील कार्यवाही केली जाणार असल्याची माहिती दिली आहे.
नवीन वेळापत्रकानुसार पुढीलप्रमाणे निवडणूक प्रक्रिया राबवली जाणार आहे.
4 डिसेंबर: जिल्हाधिकारी निवडणूक कार्यक्रम जाहीर करतील.
10 डिसेंबर (दुपारी 3 वाजेपर्यंत): नामनिर्देश मागे घेण्याची अंतिम मुदत.
11 डिसेंबर: चिन्ह वाटप व उमेदवारांची अंतिम यादी जाहीर.
20 डिसेंबर: मतदान.
21 डिसेंबर 2025: मतमोजणी.
23 डिसेंबरपूर्वी: संपूर्ण निवडणूक प्रक्रिया पूर्ण.
नव्या कार्यक्रमामुळे मंगळवेढा नगरपालिका निवडणुकीत पुन्हा उत्साह येणार आहे. न्यायालयीन प्रक्रियेतील विलंब आता मागे पडला असून संपूर्ण निवडणूक प्रक्रिया 23 डिसेंबरपूर्वी पूर्ण होणार आहे. त्यामुळे आता उमेदवारांची धाकधूक वाढल्याचे दिसून येते.
यवतमाळ नगरपरिषद निवडणूक लांबणीवर पडण्याची शक्यता
दरम्यान, यवतमाळ नगरपरिषद निवडणूक लांबणीवर पडण्याची शक्यता आहे. दिग्रस, पांढरकवडा आणि वणी येथील काही प्रभागांची निवडणूक लांबणीवर जाण्याची चिन्हे आहेत. ज्या ठिकाणी तांत्रिक चुका झाल्या, तेथे निवडणुकीसंदर्भात निवडणूक आयोगानं नव्याने कार्यक्रम दिला असून आता निवडणुक 20 डिसेंबरला होणार आहेत. निवडणूक प्रक्रिया लांबणीवर पडण्यामागे न्यायालयीन कारण असल्याचे समोर आले आहे. याबाबत निवडणूक निर्णय अधिकाऱ्यांकडून अद्याप कुठलीही अधिकृत माहिती देण्यात आलेली नाही.
अहिल्यानगरमधील निवडणुका पुढे ढकलल्या
अहिल्यानगर जिल्ह्यातील 12 पैकी 4 नगरपरिषद निवडणुका पुढे ढकलल्या आहेत. कोपरगाव, देवळाली, नेवासा आणि पाथर्डी या चार ठिकाणी नगराध्यक्षपदाच्या उमेदवाराबद्दल कोर्टात अपील असल्याने नगरपरिषद निवडणूक पुढे ढकलण्यात आली आहे. याबरोबरच सात नगरसेवक पदाच्या उमेदवाराबाबत कोर्टात अपील असल्याने त्या ठिकाणी देखील मतदान प्रक्रिया ढकलणार आहेत. पुढे ढकललेल्या नगरपरिषद आणि नगरसेवक पदाच्या निवडणूक प्रक्रियेमध्ये 10 डिसेंबरपर्यंत माघार घेण्यासाठी मुदत, तर 20 डिसेंबर मतदान आणि 21 डिसेंबर रोजी मतमोजणी होणार आहेत.
धाराशिव नगरपालिकेसाठी सुधारित कार्यक्रम
न्यायालयीन अपील दाखल झाल्यामुळे स्थगित झालेल्या धाराशिव नगरपालिकेतील तीन जागांसाठी (प्रभाग क्र. 2 अ, 7 ब आणि 14 ब) अखेर सुधारित निवडणूक कार्यक्रम राज्य निवडणूक आयोगाने 29 नोव्हेंबर रोजी उशिरा जाहीर केला. चार दिवसांपूर्वी या जागांवरील निवडणुकांना स्थगिती लागू करण्यात आली होती. त्यामुळे उमेदवार, प्रशासन व नागरिकांचे लक्ष या सुधारित कार्यक्रमाकडे लागले होते. न्यायालयीन प्रलंबित प्रकरणांमुळे बाधित झालेल्या नगरपरिषद व नगरपंचायतींच्या सार्वत्रिक निवडणुकांसाठी आयोगाने खालीलप्रमाणे सुधारित वेळापत्रक प्रसिद्ध केले आहे
4 डिसेंबर: जिल्हाधिकारी निवडणूक कार्यक्रम जाहीर करतील.
10 डिसेंबर (दुपारी 3 वाजेपर्यंत): नामनिर्देश मागे घेण्याची अंतिम मुदत.
11 डिसेंबर: चिन्ह वाटप व उमेदवारांची अंतिम यादी जाहीर.
20 डिसेंबर: मतदान.
21 डिसेंबर 2025: मतमोजणी
