मुंबई, दि.५(पीसीबी) – ऐन अनंत चतुर्दशीच्या पूर्वसंध्येला मुंबईत साखळी बॉम्बस्फोट घडवण्याची धमकी देणारा संदेश मुंबई वाहतूक पोलिसांच्या हेल्पलाइन क्रमांकावर देण्यात आला होता. मुंबईत 34 वाहनांमध्ये मानवी बॉम्ब पेरण्यात आल्याचा दावा करण्यात आल्याच्या धमकीनंतर मुंबई पोलिस सतर्क झाले. त्यानंतर नोएडा पोलिसांनी आरोपीला अटक केली आहे. दरम्यान, या प्रकरणात दिल्ली येथून पकडलेल्या व्यक्तीने तो ज्योतिषी असल्याचा दावा केला आहे.
आरोपी बिहारचा असून गेल्या पाच वर्षांपासून तो नोएडामध्ये राहत आहे. मुंबई पोलिसांच्या व्हॉट्सॲप नंबरवर धमकीचा संदेश पाठवल्याप्रकरणी पोलिसांनी त्याला अटक केली.आरोपीने शहरात अनेक ठिकाणी 34 गाड्यांमध्ये बॉम्ब ठेवल्याचा दावा केला होता. तब्बल चारशे किलो आरडीएक्स वापरून मोठा हल्ला करण्याची धमकी दिली होती, ज्यामुळे एक कोटी लोकांचा जीव जाईल, असेही म्हटले होते.
वाहतुकीबाबत तक्रारीसाठी वाहतूक पोलिसांच्या वतीने व्हाट्सअप क्रमांक देण्यात आला होता. या क्रमांकावर गुरुवारी एका अनोळखी क्रमांकावरून संदेश आला. 14 पाकिस्तानी भारतात घुसले असून, मुंबईत बॉम्बस्फोट मालिका घडविण्यात येणार आहे. यासाठी 400 किलो ‘आरडीएक्स’चा वापर करण्यात आला असून, सुमारे एक कोटी लोकांचा मृत्यू होऊ शकतो, असा दावा या संदेशात करण्यात आला आहे.
अश्विनी असे नाव असेल्या आरोपीला नोएडा सेक्टर-113 मध्ये पकडण्यात आले आणि मुंबई पोलिसांच्या ताब्यात देण्यात आले. पोलिसांनी त्याच्याकडून एक मोबाईल फोनही जप्त केला आहे. पोलिसांनी दिलेल्या माहितीनुसार, धमकी देणाऱ्याने स्वतःला पाकिस्तानमधील जिहादी संघटनेचा सदस्य असल्याचे सांगितले होते. अनेक पाकिस्तानी दहशतवादी शहरात घुसल्याचा दावा केला होता. सुरुवातीला त्याने स्वतःला ज्योतिषी असल्याचे म्हणवले आहे. परंतु पोलीस या प्रकरणाचा अधिक तपास करत आहेत.
मुंबईत गणेशोत्सव अंतिम टप्प्यात असताना ऐन अनंत चतुर्दशीच्या तोंडावर धमकी देण्यात आल्याने गांभीर्य अधिकच वाढले. परंतु सुदैवाने विघ्नहर्त्याने संकट दूर सारत उत्सवाचा शेवट गोड केला आहे. मुंबई पोलिसांनी धमकी गांभीर्याने घेत शहरात सुरक्षा व्यवस्था अधिक कडक केली होती. महत्वाच्या ठिकाणी नाकाबंदी करण्यात आली असून वाहनांची तपासणी सुरु आहे. पोलिसांनी नागरिकांना शांत राहण्याचे आवाहन केले असून कोणतीही संशयास्पद वस्तू किंवा व्यक्ती दिसल्यास पोलिसांना माहिती देण्यास सांगितलेले आहे.
