बीडमध्ये दिवसेंदिवस गुन्हेगारीचे प्रमाण वाढल्याचे दिसत आहे. देशमुख हत्येप्रकरणाला अवघे काही महिने उलटलेत त्यांच्या परिवाराला अद्याप न्याय मिळालेला नाही. अशातच धक्कादायक घटना समोर आली आहे. भरदिवसा कोयत्याने सपासप वार करत भाजप नेत्याला संपवल्याचा प्रकार उघडकीस आला आहे. रक्ताच्या थारोळ्यात पडलेला त्यांचा व्हिडीओ सध्या समाजमाध्यमांवर मोठ्या प्रमाणावर व्हायरल होत आहे. बाबासाहेब आगे असं मयत तरुणाचं नावं असून हे भाजप पदाधिकारी आहेत.
दुपारी १ वाजण्याच्या सुमारास ही धक्कादायक घटना माजलगाव शहरात घडली आहे. बाबासाहेब आगे यांच्यावर धारदार शस्त्राने अनेक वार करण्यात आले. त्यात त्यांचा जागीच मृत्यू झाला. या घटनेमुळे परिसरात खळबळ उडाली असून, हत्या करणारा आरोपी नारायण नाफळ हा थेट पोलीस ठाण्यात जात मीच खून केला, अशी कबुलीदेखील आरोपीने दिली आहे.
नेमकं घडलं तरी काय?
माजलगाव शहरातील स्वामी समर्थ मंदिराजवळ भर वस्तीत ही घटना घडली. माजलगाव तालुक्यातील किटी आडगाव ग्रामपंचायचतचे सदस्य असलेले बाबासाहेब आगे हे भाजपच्या तालुका अध्यक्ष अरुण राऊत यांच्या भेटासाठी माजलगाव शहरात स्वामी समर्थ मंदिराजवळ भाजप कार्यालय येथे आले होते. त्या कार्यालयासमोरच त्यांच्यावर कोयत्याने वार करण्यात आले. मिळालेल्या माहितीनुसार, आरोपी नारायण नाफळ याने कोयता शर्टच्या पाठीमागे लपवून आणला होता. त्यानंतर आगे यांच्यावर वार करण्यात आला. अर्थिक देवाण घेवाणच्या वादातून हत्या झाल्याची प्राथमिक माहिती समोर आली आहे.
