महाड(रायगड) दि. 23 (पीसीबी) : रायगड जिल्ह्यातून बाप लेकीच्या नात्याला काळीमा फासणारी घटना घडल्याचे उघड झाले आहे. पित्यानेच स्वतःच्या पोटच्या मुलीवर लैंगिक अत्याचार केल्याचा धक्कादायक प्रकार समोर आला आहे. महाड एमआयडीसी पोलीस ठाणे हद्दीमध्ये ही घडली आहे. आरोपीवर महाड एमआयडीसी पोलीस ठाण्यात पोक्सोअंतर्गत गुन्हा दाखल करण्यात आला आहे. या घटनेमुळे रायगड जिल्ह्यात खळबळ उडाली आहे.
याबाबत अधिक माहिती अशी की, महाड एमआयडीसी पोलीस ठाणे हद्दीमध्ये जन्मदात्या पित्यानेच स्वतःच्या मुलीवर लैंगिक अत्याचार केले. या घटनेनंतर पीडित मुलीने पोलीस ठाण्यात धाव घेत सर्व आपबीती सांगितली. पीडित मुलीच्या तक्रारीनुसार मुलीच्या बापावर महाड एमआयडीसी पोलीस ठाण्यात गुन्हा दाखल करण्यात आला आहे.
नराधम बाप अटकेत..
महाड एमआयडीसी पोलिसांकडून पीडित मुलीच्या बापाला अटक करण्यात आली असून त्याच्या विरोधात पोक्सो कलमाअंतर्गत गुन्हा दाखल करण्यात आला आहे. महाड उपविभागीय पोलीस अधिकारी शंकर काळे व महाड एमआयडीसी पोलीस ठाण्याचे सहाय्यक पोलीस निरीक्षक जीवनमाने यांच्या मार्गदर्शनाखाली पोलीस उपनिरीक्षक समेळ सुर्वे या गुन्ह्याचा अधिक तपास करत आहेत.
