मुंबई,दि. १० : काहीच महिन्यात विधानसभेच्या निवडणुका होणार आहेत. त्या पार्श्वभूमीवर भाजपचा अंतर्गत सर्व्हे आला आहे. त्यामध्ये अजित पवारांच्या राष्ट्रवादी पक्षाला ७ -११ जागा, शिंदे गटाना १७-२२ जागा तर भाजपला ६२-६७ मिळून लोकसभेची पुनरावृत्ती होण्याचा अंदाज आहे. त्यामुळे भाजपमध्ये भीती पसरली आहे. या सर्व्हेनंतर केंद्रातून हालचाली सुरु झाल्या असल्याचा दावा शरद पवार गटाचे आमदार रोहित पवार यांनी केला आहे.
२५ जागांवर मत्रीपूर्ण लढतीचा प्रस्ताव –
यंदा महायुती पहिल्यांदा विधानसभेला एकत्रितपणे लढणार आहे. लोकसभेचा निकाल पाहता भाजप कुठलीही रिस्क घेण्याच्या मूडमध्ये दिसत नाही. त्यामुळे आता तीनही पक्षांमध्ये जागावाटपावरुन रस्सीखेच नक्कीच पाहायला मिळणार आहे. तर, अमित शाह मुंबईत आले असताना अजित पवारांनी विमानतळावर त्यांची भेट घेतली आणि विधानसभेच्या निवडणुकीनंतर आपल्याला मुख्यमंत्री करावे अशी मागणी केली, अशी माहिती समोर आली आहे. तर, द हिंदू वृत्तपत्राने सूत्रांच्या हवाल्याने दिलेल्या माहितीनुसार, राज्यातील किमान २५ जागांवर मैत्रीपूर्ण लढत करावी अशी मागणी भाजप नेत्यांनी अमित शहांकडे केली आहे.
भाजपच्या अंतर्गत सर्व्हेवर रोहित पवार यांनी X या सोशल मीडिया प्लॅटफॉर्मवर एक पोस्ट शेअर करत सांगितलं की, अजित पवारांनी भाजपच्या एका बड्या नेत्याने काही ठराविक जागा ऑफर केल्या. अजितदादांनी पवार साहेबांच्या राष्ट्रवादीच्या नेत्यांना मतदारसंघातच रोखण्यासाठी त्यांच्या विरोधात मोठे नेते उभे केले किंवा अपक्ष उभे करण्याची तयारी दाखवली तर ६ ते ७ जागा अतिरिक्त देण्याचीही ऑफर देण्यात आली आहे, असंही रोहित पवार म्हणाले.
“एका अंतर्गत सूत्राच्या माहितीनुसार परवाच भाजपचा अंतर्गत सर्व्हे आला असून त्यामध्ये अजितदादांच्या गटाला ७-११ जागा, शिंदे साहेबांच्या गटाला १७-२२ जागा आणि भाजपला ६२-६७ जागा मिळून लोकसभेची पुनरावृत्ती होण्याचा अंदाज आल्याने भाजपमध्ये अंतर्गत गोटात भीती पसरलीय. यातूनच केंद्रीय स्तरावरून अनेक हालचाली सुरू झाल्या आहेत.
भाजपच्या एका मोठ्या केंद्रीय नेत्याने परवा अजितदादांना काही ठराविक जागा ऑफर केल्या असून अजितदादांनी पवार साहेबांच्या राष्ट्रवादीच्या नेत्यांना मतदारसंघातच रोखण्यासाठी त्यांच्या विरोधात मोठे नेते उभे केले किंवा अपक्ष उभे करण्याची तयारी दाखवली तर ६ ते ७ जागा अतिरिक्त देण्याचीही ऑफर दिलीय.
कर्जत-जामखेड संदर्भात तर ‘कुछ भी कर के, अभी उसे वही पे रोको’, असं सांगितल्याने कर्जत-जामखेडची लढत राज्यात सर्वाधिक लक्षवेधी आणि तेवढीच इंटेरेस्टिंग होणार हे नक्की आहे. पण मीही या महाकाय शक्तीसोबत दोन हात करायला सज्ज असून या महायुद्धात कर्जत-जामखेडकर स्वाभिमान आणि निष्ठा काय असते, ते या महाशक्तीला दाखवून देतील, असा विश्वास आहे”.
