चिंचवडचे दिवंगत भाजप आमदार लक्ष्मण जगताप यांना श्रद्धांजली वाहण्यासाठी आल्याचे पंकजा मुंडे म्हणाल्या. लक्ष्मणभाऊंच्या निधनामुळे निर्माण झालेली मोठी पोकळी अश्विनीताई भरून काढतील, असा विश्वास त्यांनी व्यक्त केला. लक्ष्मणभाऊंचे अपूर्ण स्वप्न पूर्ण करण्यासाठी आपल्याला अश्विनीताईंना आशिर्वाद द्यायचा आहे, असे आवाहन त्यांनी उपस्थितांना केले. मी येथे आले हे सफल झाले पाहिजे, मला मान खाली घालायला लागली नाही पाहिजे, असेही त्या म्हणाल्या.

यावेळी `कोण आली रे कोण आली, महाराष्ट्राची वाघीण आली`अशी जोरदार घोषणाबाजी उपस्थितांनी केली. तो धागा पकडून महाराष्ट्राची ही वाघीण चिंचवडची वाघीण अश्विनीताईंसाठी आल्याचे त्यांनी सांगितले. रहाटणीतील विमल गार्डनमधील त्यांच्या या सभेला मावळचे खासदार श्रीरंग बारणे, माजी खासदार अमर साबळे, पिंपरी-चिंचवड भाजपचे अध्यक्ष आणि भोसरीचे आमदार महेश लांडगे, आमदार उमा खापरे, प्रदेश प्रवक्ते एकनाथ पवार, प्रदेश सचिव अमित गोरखे आदींसह अश्विनी जगताप व्यासपीठावर होते.
पंकजांचे यावेळचे वीस मिनिटांचे भाषण त्यांच्या नेहमीच्या आक्रमक शैलीतच झाले. शास्तीकर माफीसारखा न्याय तुम्हाला आधी का मिळाला नाही, अशी विचारणा करीत भाजप राज्यात सत्तेत आल्यानंतरच ही पूर्ण करमाफी झाली, याकडे त्यांनी लक्ष वेधले. मतदान मागणारे आम्ही वधूपक्षाकडील मंडळी आहोत, असे त्या नर्मविनोदी शैलीत म्हणताच, उपस्थितांनीही त्याला हसून दाद दिली.

शास्तीचा प्रश्न मिटवल्यानंतर आता शहरवासियांचा प्रॉपर्टी कार्डचीही समस्या मार्गी लावणार असून त्यासाठी मुख्यमंत्र्यांना भेटणार असल्याचे त्यांनी सांगितले.अश्विनीताईंच्या विजयानंतर तसेच प्रॉपर्टी कार्ड वाटपासाठी मला बोलवा,असे त्या आपल्या स्टाईलमध्ये म्हणताच पुन्हा टाळ्या झाल्या.

कसबा आणि चिंचवड विधानसभा पोटनिवडणुकीसाठी २६ फेब्रुवारी रोजी मतदान होणार आहे. ही निवडणूक बिनविरोध व्हावी. यासाठी भाजपतर्फे महाविकास आघाडीच्या नेत्यांना आवाहन करण्यात आले होते. मात्र, निवडणूक होणार यावर शिक्कामोर्तब झाले आहे. दरम्यान, भाजपचे राष्ट्रीय सचिव अरुण सिंग यांनी मुख्य निवडणूक आयुक्त राजीव कुमार यांना स्टार प्रचारकांची यादी पाठवली आहे. केंद्र, राज्य आणि शहर पातळीवरील नेत्यांचा निवडणूक प्रचारात सहभाग करून घेण्यात आला आहे.

प्रदेशाध्यक्ष चंद्रशेखर बावनकुळे, उपमुख्यमंत्री देवेंद्र फडणवीस, केंद्रीय मंत्री नितीन गडकरी, नारायण राणे, रावसाहेब दानवे-पाटील, भागवत कराड, राष्ट्रीय सचिव पंकजा मुंडे, पालकमंत्री चंद्रकांत पाटील, निवडणूक प्रभारी मुरलीधर मोहोळ, विधान परिषदेचे सभापती प्रवीण दरेकर, खासदार उदयनराजे भोसले, गिरीश बापट, मंत्री सुधीर मुनगंटीवार, आमदार आशिष शेलार, महिला मोर्चा प्रदेशाध्यक्षा चित्रा वाघ, ओबीसी मोर्चा प्रदेशाध्यक्ष योगेश टिळेकर, आमदार विनोद तावडे, श्रीकांत भारतीय, रवींद्र चव्हाण, सुनील कर्जतकर, खासदार धनंजय महाडीक, आमदार राहुल कुल, गोपीचंद पडळकर, बाळा भेगडे, विजय देशमुख, माधुरी मिसाळ, विक्रांत पाटील, विजय चौधरी, जगदीश मुळीक, राजेश पांडे, सुधाकर भालेराव, वासुदेव काळे, इजाझ देशमुख, संदीप भंडारी, प्रकाश जावडेकर, दिलीप कांबळे, शहराध्यक्ष महेश लांडगे, हर्षवर्धन पाटील, उमा खापरे, अमर साबळे अशा चाळीस जणांचा प्रचारकांच्या यादीत समावेश आहे.