मुंबई, दि. ९ (पीसीबी) – बॉलिवूड अभिनेत्री अमिषा पटेल नुकतीच ‘धर्मवीर’ सिनेमाच्या ट्रेलर लॉन्चला गेली होती. या कार्यक्रमाला सलमान खान, रितेश देशमुख, अमिषा पटेल यांच्यासोबतच शिवसेनेचे अनेक प्रमुख नेतेही उपस्थित होते. खासदार संजय राऊत यांनीही उपस्थिती लावली होती. सध्या सगळीकडे प्रसाद ओक स्टारर ‘धर्मवीर’ सिनेमाची चर्चा असताना सोशल मीडियावर मात्र संजय राऊत आणि अमिषा पटेल यांच्या भेटीची चर्चा सुरू आहे.
स्वतः अमिषाने या ट्रेलर लाँच कार्यक्रमाचा एक व्हिडिओ शेअर केला आहे, ज्यात ती व्यासपीठावर जाताना तिला संजय राऊत दिसतात. यानंतर ती त्यांच्या जवळ जाते आणि त्यांना ‘जादू की झप्पी’ देते. यानंतर राऊतही तिच्याशी मनमोकळेपणाने गप्पा मारतात. काही क्षण त्यांच्याशी बोलून ती पुढे निघते.१३ मे रोजी संपूर्ण महाराष्ट्रात प्रदर्शित होणाऱ्या या सिनेमात आनंद दिघे यांचा आयुष्यपट मांडण्यात आलाा आहे. प्रविण तरडे दिग्दर्शित या सिनेमात प्रसाद ओकने आनंद दिघे यांची व्यक्तिरेखा साकारली असून झी स्टुडियोज आणि साहिल मोशन आर्ट्सने सिनेमाची निर्मिती केली आहे.
