मुंबई, दि. १३ (पीसीबी) – मुंबईतील एका ३३ वर्षीय अभिनेत्रीला सतत फोन करून भूमिका देण्याच्या बदल्यात शरीरसंबंध ठेवण्याची मागणी करणाऱ्या एका अज्ञात व्यक्तीविरुद्ध ओशिवरा पोलीस ठाण्यात तक्रार दाखल करण्यात आली आहे. ही अज्ञात व्यक्ती या कामासाठी या अभिनेत्रीला ५ कोटी रुपयांचे आश्वासन देत होती. इतकेच नाही, तर ही व्यक्ती या अभिनेत्रीला तिच्या व्हॉट्सअपवर आक्षेपार्ह व्हिडिओ देखील पाठवत होती.
या अज्ञात व्यक्तीने या अभिनेत्रीला तिच्या मोबाइलवर आक्षेपार्ह मेसेज देखील पाठवल्याचे तक्रारीत म्हटले आहे. या संदर्भात ओशिवरा पोलीस ३ मोबाइल क्रमांकांचा तपास करत आहेत.
या अज्ञात व्यक्तीकडून अभिनेत्रीला ऑक्टोबर २०१८ पासून सतत फोन येत आहेत. आपण राहुल चौधरी असल्याचे ही व्यक्ती अभिनेत्रीला सांगत असल्याचेही तक्रारीत नमूद करण्यात आले आहे. ओशिवरा पोलीस आपल्या सायबर सेलच्या मदतीने आरोपीला पकडण्याचा प्रयत्न करत असल्याचे ओशिवरा पोलीस ठाण्याच्या पोलीस अधिकाऱ्याने सांगितले.
अज्ञात व्यक्तीविरोधात आयपीसी आणि आयटी कायद्यांतर्गत लैंगिक शोषणाची तक्रार दाखल करण्यात आली आहे.
