मुंबई, दि. १५ (पीसीबी) – भारतीय संघाचा कर्णधार विराट कोहली रायगड किल्ल्यावर जाणार आहे. खासदार छत्रपती संभाजीराजे आणि विराट कोहली यांच्यात भेट झाली. या भेटीत स्वतः विराट कोहलीने रायगडावर जाण्याची इच्छा व्यक्त केली, अशी माहिती सभाजीराजे यांनी फेसबुकवरील पोस्टमधून दिलीय.
भारतीय क्रिकेट संघाच्या निवड समितीचे सदस्य जतीन परांजपे यांनी विराट आणि संभाजीराजेंची भेट घडवून आणली. या भेटीआधी जतीन यांनी आपल्या सामाजिक कार्याविषयी आणि विशेषतः छत्रपती शिवाजी महाराजांच्या गडकोटांसाठी करत असलेल्या कामाची माहिती कदाचित दिली असावी. त्यामुळेच विराटने स्वतः होऊन रायगड किल्ल्यावर येण्याची इच्छा व्यक्त केली, असेही संभाजीराजे यांनी फेसबुक पोस्टमध्ये म्हटले आहे.
विराट कोहलीसोबत महाराष्ट्राच्या क्रिकेटवरही चर्चा झाली. येत्या काळात ‘महाराष्ट्र क्रिकेट असोसिएशन’ च्या माध्यमातून भरपूर काम करायचे आहे. महाराष्ट्राच्या तळागाळातील टॅलेंटेड खेळाडूंना योग्य संधी मिळेल यासाठी प्रयत्न करणार आहे, असे संभाजीराजेंनी म्हटले आहे. खासदार संभाजीराजे यांची महाराष्ट्र क्रिकेट असोसिएशनच्या सदस्यपदी नुकतीच निवड झालीय. यानिवडीनंतर संभाजीराजे आणि विराटची भेट झाली.