पिंपरी, दि. २९ (पीसीबी) – वाकडमधील एका जागेचा मालकी हक्क निश्चित नसताना पिंपरी-चिंचवड महापालिकेच्या नगररचना आणि बांधकाम परवाना विभागातील वरिष्ठ अधिकाऱ्यांना “चिरीमिरी” देऊन या जागेत तब्बल १३ मजली गृहप्रकल्प उभारण्याचा बांधकाम परवाना घेतलेल्या मुंबईतील एका बिल्डरला महापालिका आयुक्त श्रावण हर्डीकर यांनी दणका दिला आहे. महापालिकेच्या या बेकायदेशीर बांधकाम परवानाविरोधात वाकडमधील भुजबळ कुटुंबियांनी आत्महदनाचा इशारा दिला होता. त्याची दखल घेत आयुक्त हर्डीकर यांनी भुजबळ कुटुंबिय आणि संबंधित बिल्डरांची दोनवेळा सुनावणी घेतली. मालकी हक्क निश्चित होईपर्यंत गृहप्रकल्पाचे बांधकाम स्थगित करण्याचे आणि सदनिकांची विक्री न करण्याचे आदेश आयुक्त हर्डीकर यांनी दिले आहेत. आयुक्त हर्डीकर यांच्या या पारदर्शी कारभाराबाबत भुजबळ कुटुंबियांनी समाधान व्यक्त केले आहे. परंतु, मालकी हक्क निश्चित नसताना बिल्डरला बांधकाम परवानगी दिलेल्या अधिकाऱ्यांवर आयुक्त काय कारवाई करणार याकडे सर्वांचे लक्ष लागले आहे.
