मुंबई, दि. २४ (पीसीबी) – उत्सुकता… धाकधूक…. जल्लोष… गुलालाची उधळण… फटाक्यांचा कडकडाट… ढोलताशांचा दणदणाट… जयघोष आणि कोठे निराशेची सामसूम…! अशा भावभावनांच्या कल्लोळात मुंबईची शान असलेल्या लालबागच्या राजाचे आज (सोमवारी) सकाळच्या सुमारास विसर्जन करण्यात आले. लालबागच्या राजाची विसर्जन मिरवणूक तब्बल २० तासांहून अधिक वेळ चालली. दहा दिवस बाप्पाची मनोभावे पूजा केल्यानंतर अखेरची आरती घेऊन बाप्पाला अलोट गर्दीच्या साक्षीने गिरगाव चौपाटीच्या खोल समुद्रात निरोप देण्यात आला. निरोपाचा क्षण जवळ आला तसा सर्वांचाच कंठ दाटून आला होता. त्या अवस्थेतही ‘पुढल्या वर्षी लवकर या…’चा घोष आसमंतात घुमत होता.
