मुंबई, दि. ३१ (पीसीबी) – राष्ट्रवादी काँग्रेसचे अध्यक्ष शरद पवार हे पक्षामध्ये मोठी उलथापालथ करणार असल्याची माहिती सुत्रांनी दिली आहे. विधानसभा निवडणुकीत राष्ट्रवादीकडून नवीन चेहऱ्यांना संधी दिली जाणार असल्याचे बोलले जात आहे. लोकसभा निवडणुकीतील पराभवानंतर विधानसभा निवडणुकीत तरुण नेतृत्वाला संधी दिली पाहिजे, अशी भूमिका शरद पवारांनी घेतली आहे. त्यामुळे राष्ट्रवादीत अंतर्गत मोठी फेररचना होण्याची शक्यता बळावली आहे. विधानसभा निवडणुकीला सामोरे जाण्याआधी पक्षातील नकारात्म बाबी दूर करण्यासाठी पवार पावले उचलणार आहेत. त्यासाठी पहिले पाऊल म्हणून विधानसभेत जास्तीत जास्त तरुणांना तिकीट देण्याच्या तयारीत राष्ट्रवादी काँग्रेस आहे.
