मुंबई, दि. १७ (पीसीबी) – राज्यातील लोकसभेच्या ४८ पैकी १५ मतदारसंघांत मराठा विरुद्ध मराठा, तर एका जागी कुणबी विरुद्ध कुणबी अशी थेट लढत असल्याने यंदाच्या निवडणुकीत ‘मराठा फॅक्टर’ कितपत प्रभावी ठरेल याबाबत उत्सुकता निर्माण झाली आहे. २ वर्षांपूर्वी मराठा मूक मोर्चाच्या माध्यमातून राजकीय भूमिका आणि पक्षभेद विसरून एक झालेला मराठा समाज यंदाच्या लोकसभा निवडणुकीत मात्र पुन्हा एकदा विविध गटांमध्ये विभागला गेला आहे. त्यातही लोकसभा निवडणुकांच्या पार्श्वभूमीवर पार पडलेल्या सकल मराठा समाजाच्या बैठकांमध्येही ठोस राजकीय भूमिका निश्चित न झाल्याने तूर्तास तरी मराठा समाजाचा कल स्पष्ट होऊ शकलेला नाही.
