मुंबई, दि.२६ (पीसीबी) – भाजप व शिवसेनेतील जागावाटपाचा तिढा कायम असल्याने मुख्यमंत्री देवेंद्र फडणवीस हे आधी मुंबईत शिवसेनेचे पक्षप्रमुख उद्धव ठाकरे यांच्याशी चर्चा करूनच दिल्ली गाठणार आहेत. दिल्लीत ते जागावाटपाबाबत पक्षनेतृत्वाशी चर्चा करणार आहेत.
युतीचे गाडे अडलेले असतानाच, बुधवारी मुख्यमंत्री फडणवीस आणि उद्धव ठाकरे बुधवारी नवी मुंबईत एकत्र आले होते. यामध्ये दोघांनीही ‘पुढील सरकार युतीचेच’ असा विश्वास व्यक्त केल्याने युतीचे संकेत मिळत आहेत. जागांचा तिढा सोडवण्यासाठी बुधवारी रात्री मुख्यमंत्री व उद्धव यांची भेट निश्चित झाली होती. त्यानंतरच मुख्यमंत्री फडणवीस दिल्लीतील नेत्यांची भेट घेण्यासाठी रवाना होणार आहेत. ‘बुधवारी रात्री उशिरा मुख्यमंत्री ‘मातोश्री’वर येऊ शकतात अथवा उद्धव ठाकरे ‘वर्षा’वर जाऊन मुख्यमंत्र्यांशी चर्चा करू शकतात’, ‘मुख्यमंत्री दिल्लीला जाणार, की नाही याविषयी आपल्याला माहिती नाही. मात्र दिल्लीतील नेत्यांशी युतीविषयी अंतिम बोलणी करण्याआधी मुख्यमंत्री हे उद्धव ठाकरे यांच्याशी संपर्क साधतील’, असे या नेत्याने सांगितले. नवी मुंबईत माथाडी कामगारांच्या मेळाव्यातील गर्दीमुळे या दोघांमध्ये सविस्तर चर्चा होऊ शकली नसली तरी यावेळी दोघांमध्ये युतीबाबतची आवश्यक बोलणी झाल्याचे कळते.