पिंपरी, दि. २ (पीसीबी) – आगामी लोकसभा निवडणुकीत मावळ लोकसभा मतदारसंघ काबिज करण्यासाठी राष्ट्रवादी काँग्रेस राजकीय धक्कातंत्र वापरण्याची शक्यता आहे. या मतदारसंघात राष्ट्रवादीची मोठी ताकद असली तरी पक्षातील बेदिलीमुळे उमेदवार विजयी होत नाही. त्यामुळे मावळ मतदारसंघातून माजी उपमुख्यमंत्री अजितदादा पवार यांचे सुपूत्र पार्थ पवार यांना राष्ट्रवादीकडून मैदानात उतरवण्याची राजकीय खेळी खेळली जाण्याची शक्यता आहे. त्याबाबत पक्ष पातळीवर चर्चाही झाल्याचे बोलले जाते. त्यामुळे मावळ मतदारसंघातून पार्थ पवार मैदानात उतरल्यास या मतदारसंघातील राजकीय संदर्भ पूर्णपणे बदलणार आहेत. गेल्यावेळी राष्ट्रवादीच्या मदतीने लोकसभेचे मैदान मारलेले विद्यमान खासदार श्रीरंग बारणे यांच्यासमोरील अडचणी वाढणार आहेत.