पिंपरी, दि. १९ (पीसीबी) – मावळ लोकसभा मतदारसंघातील शिवसेनेचे उमेदवार श्रीरंग बारणे यांची एकूण संपत्ती १०२ कोटी पेक्षा जास्त असल्याचे समोर आले आहे. कोट्यधीश बारणे यांनी खोपटे हे गाव दत्तक घेतले आहे. हे दत्तक गाव त्यांना स्वतःच्या खर्चाने सुद्धा सुजलाम् सुफलाम् करता आले असते. प्रत्यक्षात बारणे यांनी दत्तक गावाचा काय कायापालट केलेला आहे हे अजून तरी कोणालाच समजलेले नाही. खासदार बारणे म्हणजे प्रसिद्धीसाठी हपापलेले राजकारणी म्हणून सुपरिचित आहेत. मित्रपक्ष भाजपने देखील बारणे यांचे “फोटोवाला खासदार” म्हणून नामकरण केले आहे. प्रत्येक गोष्टीत प्रसिद्धी मिळवणारे बारणे दत्तक गावाबाबत मात्र गेल्या पाच वर्षात चकार शब्द बोललेले नाहीत. त्यामुळे कुठे तरी पाणी मुरत असल्याची भावना मतदारांमध्ये निर्माण झाली आहे. परिणामी बारणे यांनी दत्तक घेतलेल्या गावाचा कायापालट जनतेसमोर आणण्याची गरज आहे.