तिरूअनंतपुरम, दि. १७ (पीसीबी) – मंदिरात सर्व वयोगटाच्या महिलांना प्रवेश देण्याचे आदेश सर्वोच्च न्यायालयाने दिल्यानंतर आज, बुधवारी संध्याकाळी मासिक पुजेसाठी हे मंदिर प्रथमच उघडले जाणार आहे. मात्र मंगळवारी अय्यप्पाच्या भाविक महिलांनी शबरीमला मंदिराकडे निघालेल्या १० ते ५० वर्षे वयोगटातील मुली व महिलांना रोखल्याने तणावाची स्थिती निर्माण झाली आहे. या वयोगटातील महिलांना मंदिरात प्रवेश दिल्यास सामुहिक आत्महत्या करण्याचा इशारा भाविकांनी दिला आहे.
सर्वोच्च न्यायालयाच्या आदेशानंतर महिलांच्या मंदिर प्रवेशावरून उद्भवणाऱ्या संघर्षावर तोडगा काढण्याच्या हेतूने शबरीमला मंदिराचे व्यवस्थापन पाहणाऱ्या ‘त्रावणकोर देवस्वम बोर्डा’ने मंगळवारी बैठक बोलावली होती. या बैठकीत सर्वोच्च न्यायालयाच्या आदेशाविरोधात पुनरावलोकन याचिका दाखल करण्याबाबत चर्चा करण्यास बोर्डाने अनिच्छा दर्शवल्याने पंडालम राजघराण्याचे कुटुंबीय तसेच देवस्थान समितीच्या सदस्यांनी बैठकीवर बहिष्कार टाकला. तर, दुसरीकडे शेकडो महिला भाविकांनी मंगळवारी शबरीमला मंदिरापासून २० किमी अलीकडे असलेल्या निलक्कलच्या घाट रस्त्यावर अक्षरश: नाकाबंदी केली. या महिला शबरीमला मंदिराकडे निघालेल्या बस, खासगी वाहने अशा सर्व गाड्यांची तपासणी करीत होत्या. या गाड्यांमध्ये १० ते ५० वयोगटातील मुली व महिला असल्यास त्यांना तिथेच उतरवून रोखले जात होते. याचा फटका आजच्या कार्यक्रमाच्या वृत्तांकनासाठी निघालेल्या महिला पत्रकारांनाही बसला.
दरम्यान, केरळचे मुख्यमंत्री पिनरयी विजयन यांनी महिलांना मंदिर प्रवेशापासून रोखण्याचा प्रयत्न करणाऱ्यांवर कडक कारवाई केली जाईल, असा इशारा दिला आहे. ते म्हणाले, ‘सर्वोच्च न्यायालयाच्या आदेशाची आम्ही काटेकोरपणे अंमलबजावणी करणार आहोत. त्याचवेळी कोणालाही कायदा हातात घेऊ दिला जाणार नाही. शबरीमलाच्या नावाखाली हिंसाचार खपवून घेतला जाणार नाही.’