पिंपरी, दि. १५ (पीसीबी) – पिंपरी-चिंचवड महापालिका प्रशासनाला हलवण्याची ताकद असलेले महापौर, सत्तारूढ पक्षनेते, विरोधी पक्षनेते ही तीन महत्त्वाची पदे चिखली या एकाच परिसरातील नगरसेवकांकडे आहेत. तरी देखील चिखली परिसराचा फेरफटका मारल्यास शहराच्या अन्य भागात असणारा झोपडपट्टीचा परिसर बरा आहे बुवा, अशी म्हणण्याची वेळ आल्याशिवाय राहात नाही. या तिघांनाही आपल्या परिसरातील साधे रस्तेही स्वच्छ ठेवता येत नाहीत. तरी देखील ते शहर विकासाबाबत मोठमोठ्या बढाया मारण्यात कोणतीही कसर ठेवत नाहीत. त्यामुळे महापौर राहुल जाधव, सत्तारूढ पक्षनेते एकनाथ पवार, विरोधी पक्षनेते दत्ता साने यांची अवस्था “नाचता येईना अंगण वाकडे” या म्हणीसारखी झाली आहे, असे म्हटल्यास वावगे ठरणार नाही. महापालिकेतील सर्वोच्च पदांवर बसूनही आपला प्रभाग व्यवस्थित न ठेवणाऱ्यांना शहराच्या विकासाबाबत आश्वासने देण्याचा किंवा विरोधी पक्षनेत्यांना सत्ताधाऱ्यांवर टिका करण्याचा नैतिक अधिकार आहे का?, हा खरा प्रश्न आहे.
