मुंबई, दि. १६ (पीसीबी) – मलायका अरोरा आणि अर्जुन कपूर १९ एप्रिलला लग्नाच्या बेडीत अडकणार आहेत अशी जोरदार चर्चा बॉलिवूडमध्ये रंगली आहे. आपल्या नात्याबद्दल जाहीरपणे न बोलणाऱ्या मलायका आणि अर्जुननं मात्र याबद्दल आजवर कोणतीही प्रतिक्रिया दिली नव्हती. परंतु, आता मात्र मलायकानं या विषयावरील आपलं मौन सोडलंय.
मलायका आणि अर्जुनला अनेकदा एकत्र फिरताना त्यांच्या चाहत्यांनी पाहिलंय. त्यातच आता हे दोघंही लग्न करणार अशा चर्चांना उधाण आलं. मलायका तिच्या गर्ल गँगसोबत मालदिवला दिसली, त्यामुळे लग्नाआधी मैत्रिणींनी तिला दिलेलं हे खास गिफ्ट आहे असंही समजंल. हे दोघंही जवळचे मित्र मंडळी आणि नातेवाईक यांच्या साक्षीनं गोव्यात लग्न करणार असल्याची माहिती मिळाली. परंतु, मलायकानं मात्र या सगळ्या अफवा असल्याचं स्पष्ट केलंय. लग्नाबाबत जे अंदाज बांधले जात आहेत त्यात काहीही तथ्य नाही असा खुलासा तिनं केला आहे.
त्यामुळे, या दोघांच्या लग्नाबद्दल पुन्हा प्रश्नचिन्ह उभं राहिलंय. दरम्यान, मलायका आणि अर्जुनच्या लग्नाबाबत तिचा पूर्वाश्रमीचा पती अरबाज खानला एका कार्यक्रमात प्रश्न विचारण्यात आला. या प्रश्नावर त्याने जोरात हसत उत्तर देणं टाळलं. अरबाज- मलायका हे दोघंही १८ वर्ष संसार केल्यावर वर्षभरापूर्वी विभक्त झाले. त्यानंतर मलायका अर्जुनला तर अरबाज मॉडेल जॉर्जिया एण्ड्रीयानीला डेट करू लागले. मलायका-अर्जुननंतर आता अरबाज आणि जॉर्जिया लवकरच लग्न करणार असल्याचीदेखील चर्चा आहे.